Sukta 3

Rk 1

ए॒ष दे॒वो अम॑र्त्यः पर्ण॒वीरि॑व दीयति अ॒भि द्रोणा॑न्या॒सद॑म्

Rk 2

ए॒ष दे॒वो वि॒पा कृ॒तोऽति॒ ह्वरां॑सि धावति पव॑मानो॒ अदा॑भ्यः

Rk 3

ए॒ष दे॒वो वि॑प॒न्युभिः॒ पव॑मान ऋता॒युभिः॑ हरि॒र्वाजा॑य मृज्यते

Rk 4

ए॒ष विश्वा॑नि॒ वार्या॒ शूरो॒ यन्नि॑व॒ सत्व॑भिः पव॑मानः सिषासति

Rk 5

ए॒ष दे॒वो र॑थर्यति॒ पव॑मानो दशस्यति आ॒विष्कृ॑णोति वग्व॒नुम्

Rk 6

ए॒ष विप्रै॑र॒भिष्टु॑तो॒ऽपो दे॒वो वि गा॑हते दध॒द्रत्ना॑नि दा॒शुषे॑

Rk 7

ए॒ष दिवं॒ वि धा॑वति ति॒रो रजां॑सि॒ धार॑या पव॑मानः॒ कनि॑क्रदत्

Rk 8

ए॒ष दिवं॒ व्यास॑रत्ति॒रो रजां॒स्यस्पृ॑तः पव॑मानः स्वध्व॒रः

Rk 9

ए॒ष प्र॒त्नेन॒ जन्म॑ना दे॒वो दे॒वेभ्यः॑ सु॒तः हरिः॑ प॒वित्रे॑ अर्षति

Rk 10

ए॒ष उ॒ स्य पु॑रुव्र॒तो ज॑ज्ञा॒नो ज॒नय॒न्निषः॑ धार॑या पवते सु॒तः