Sukta 2

Rk 1

पव॑स्व देव॒वीरति॑ प॒वित्रं॑ सोम॒ रंह्या॑ इन्द्र॑मिन्दो॒ वृषा वि॑श

Rk 2

आ व॑च्यस्व॒ महि॒ प्सरो॒ वृषे॑न्दो द्यु॒म्नव॑त्तमः आ योनिं॑ धर्ण॒सिः स॑दः

Rk 3

अधु॑क्षत प्रि॒यं मधु॒ धारा॑ सु॒तस्य॑ वे॒धसः॑ अ॒पो व॑सिष्ट सु॒क्रतुः॑

Rk 4

म॒हान्तं॑ त्वा म॒हीरन्वापो॑ अर्षन्ति॒ सिन्ध॑वः यद्गोभि॑र्वासयि॒ष्यसे॑

Rk 5

स॒मु॒द्रो अ॒प्सु मा॑मृजे विष्ट॒म्भो ध॒रुणो॑ दि॒वः सोमः॑ प॒वित्रे॑ अस्म॒युः

Rk 6

अचि॑क्रद॒द्वृषा॒ हरि॑र्म॒हान्मि॒त्रो न द॑र्श॒तः सं सूर्ये॑ण रोचते

Rk 7

गिर॑स्त इन्द॒ ओज॑सा मर्मृ॒ज्यन्ते॑ अप॒स्युवः॑ याभि॒र्मदा॑य॒ शुम्भ॑से

Rk 8

तं त्वा॒ मदा॑य॒ घृष्व॑य उ लोककृ॒त्नुमी॑महे तव॒ प्रश॑स्तयो म॒हीः

Rk 9

अ॒स्मभ्य॑मिन्दविन्द्र॒युर्मध्वः॑ पवस्व॒ धार॑या प॒र्जन्यो॑ वृष्टि॒माँ इ॑व

Rk 10

गो॒षा इ॑न्दो नृ॒षा अ॑स्यश्व॒सा वा॑ज॒सा उ॒त आ॒त्मा य॒ज्ञस्य॑ पू॒र्व्यः