Sukta 4

Rk 1

सना॑ च सोम॒ जेषि॑ च॒ पव॑मान॒ महि॒ श्रवः॑ अथा॑ नो॒ वस्य॑सस्कृधि

Rk 2

सना॒ ज्योतिः॒ सना॒ स्व१॒॑र्विश्वा॑ च सोम॒ सौभ॑गा अथा॑ नो॒ वस्य॑सस्कृधि

Rk 3

सना॒ दक्ष॑मु॒त क्रतु॒मप॑ सोम॒ मृधो॑ जहि अथा॑ नो॒ वस्य॑सस्कृधि

Rk 4

पवी॑तारः पुनी॒तन॒ सोम॒मिन्द्रा॑य॒ पात॑वे अथा॑ नो॒ वस्य॑सस्कृधि

Rk 5

त्वं सूर्ये॑ न॒ आ भ॑ज॒ तव॒ क्रत्वा॒ तवो॒तिभिः॑ अथा॑ नो॒ वस्य॑सस्कृधि

Rk 6

तव॒ क्रत्वा॒ तवो॒तिभि॒र्ज्योक्प॑श्येम॒ सूर्य॑म् अथा॑ नो॒ वस्य॑सस्कृधि

Rk 7

अ॒भ्य॑र्ष स्वायुध॒ सोम॑ द्वि॒बर्ह॑सं र॒यिम् अथा॑ नो॒ वस्य॑सस्कृधि

Rk 8

अ॒भ्य१॒॑र्षान॑पच्युतो र॒यिं स॒मत्सु॑ सास॒हिः अथा॑ नो॒ वस्य॑सस्कृधि

Rk 9

त्वां य॒ज्ञैर॑वीवृध॒न्पव॑मान॒ विध॑र्मणि अथा॑ नो॒ वस्य॑सस्कृधि

Rk 10

र॒यिं न॑श्चि॒त्रम॒श्विन॒मिन्दो॑ वि॒श्वायु॒मा भ॑र अथा॑ नो॒ वस्य॑सस्कृधि