Sukta 82
Mandala 8 · 9 rks
9 rks · free forever
Listen at your pace. New audio may take a moment to prepare. Narration settings
Rk 1
आ प्र द्र॑व परा॒वतो॑ऽर्वा॒वत॑श्च वृत्रहन् मध्वः॒ प्रति॒ प्रभ॑र्मणि
Rk 2
ती॒व्राः सोमा॑स॒ आ ग॑हि सु॒तासो॑ मादयि॒ष्णवः॑ पिबा॑ द॒धृग्यथो॑चि॒षे
Rk 3
इ॒षा म॑न्द॒स्वादु॒ तेऽरं॒ वरा॑य म॒न्यवे॑ भुव॑त्त इन्द्र॒ शं हृ॒दे
Rk 4
आ त्व॑शत्र॒वा ग॑हि॒ न्यु१॒॑क्थानि॑ च हूयसे उ॒प॒मे रो॑च॒ने दि॒वः
Rk 5
तुभ्या॒यमद्रि॑भिः सु॒तो गोभिः॑ श्री॒तो मदा॑य॒ कम् प्र सोम॑ इन्द्र हूयते
Rk 6
इन्द्र॑ श्रु॒धि सु मे॒ हव॑म॒स्मे सु॒तस्य॒ गोम॑तः वि पी॒तिं तृ॒प्तिम॑श्नुहि
Rk 7
य इ॑न्द्र चम॒सेष्वा सोम॑श्च॒मूषु॑ ते सु॒तः पिबेद॑स्य॒ त्वमी॑शिषे
Rk 8
यो अ॒प्सु च॒न्द्रमा॑ इव॒ सोम॑श्च॒मूषु॒ ददृ॑शे पिबेद॑स्य॒ त्वमी॑शिषे
Rk 9
यं ते॑ श्ये॒नः प॒दाभ॑रत्ति॒रो रजां॒स्यस्पृ॑तम् पिबेद॑स्य॒ त्वमी॑शिषे