Sukta 81
Mandala 8 · 9 rks
9 rks · free forever
Listen at your pace. New audio may take a moment to prepare. Narration settings
Rk 1
आ तू न॑ इन्द्र क्षु॒मन्तं॑ चि॒त्रं ग्रा॒भं सं गृ॑भाय म॒हा॒ह॒स्ती दक्षि॑णेन
Rk 2
वि॒द्मा हि त्वा॑ तुविकू॒र्मिं तु॒विदे॑ष्णं तु॒वीम॑घम् तु॒वि॒मा॒त्रमवो॑भिः
Rk 3
न॒हि त्वा॑ शूर दे॒वा न मर्ता॑सो॒ दित्स॑न्तम् भी॒मं न गां वा॒रय॑न्ते
Rk 4
एतो॒ न्विन्द्रं॒ स्तवा॒मेशा॑नं॒ वस्वः॑ स्व॒राज॑म् न राध॑सा मर्धिषन्नः
Rk 5
प्र स्तो॑ष॒दुप॑ गासिष॒च्छ्रव॒त्साम॑ गी॒यमा॑नम् अ॒भि राध॑सा जुगुरत्
Rk 6
आ नो॑ भर॒ दक्षि॑णेना॒भि स॒व्येन॒ प्र मृ॑श इन्द्र॒ मा नो॒ वसो॒र्निर्भा॑क्
Rk 7
उप॑ क्रम॒स्वा भ॑र धृष॒ता धृ॑ष्णो॒ जना॑नाम् अदा॑शूष्टरस्य॒ वेदः॑
Rk 8
इन्द्र॒ य उ॒ नु ते॒ अस्ति॒ वाजो॒ विप्रे॑भिः॒ सनि॑त्वः अ॒स्माभिः॒ सु तं स॑नुहि
Rk 9
स॒द्यो॒जुव॑स्ते॒ वाजा॑ अ॒स्मभ्यं॑ वि॒श्वश्च॑न्द्राः वशै॑श्च म॒क्षू ज॑रन्ते