Sukta 13

Rk 1

इन्द्रः॑ सु॒तेषु॒ सोमे॑षु॒ क्रतुं॑ पुनीत उ॒क्थ्य॑म् वि॒दे वृ॒धस्य॒ दक्ष॑सो म॒हान्हि षः

Rk 2

स प्र॑थ॒मे व्यो॑मनि दे॒वानां॒ सद॑ने वृ॒धः सु॒पा॒रः सु॒श्रव॑स्तमः॒ सम॑प्सु॒जित्

Rk 3

तम॑ह्वे॒ वाज॑सातय॒ इन्द्रं॒ भरा॑य शु॒ष्मिण॑म् भवा॑ नः सु॒म्ने अन्त॑मः॒ सखा॑ वृ॒धे

Rk 4

इ॒यं त॑ इन्द्र गिर्वणो रा॒तिः क्ष॑रति सुन्व॒तः म॒न्दा॒नो अ॒स्य ब॒र्हिषो॒ वि रा॑जसि

Rk 5

नू॒नं तदि॑न्द्र दद्धि नो॒ यत्त्वा॑ सु॒न्वन्त॒ ईम॑हे र॒यिं न॑श्चि॒त्रमा भ॑रा स्व॒र्विद॑म्

Rk 6

स्तो॒ता यत्ते॒ विच॑र्षणिरतिप्रश॒र्धय॒द्गिरः॑ व॒या इ॒वानु॑ रोहते जु॒षन्त॒ यत्

Rk 7

प्र॒त्न॒वज्ज॑नया॒ गिरः॑ शृणु॒धी ज॑रि॒तुर्हव॑म् मदे॑मदे ववक्षिथा सु॒कृत्व॑ने

Rk 8

क्रीळ॑न्त्यस्य सू॒नृता॒ आपो॒ न प्र॒वता॑ य॒तीः अ॒या धि॒या य उ॒च्यते॒ पति॑र्दि॒वः

Rk 9

उ॒तो पति॒र्य उ॒च्यते॑ कृष्टी॒नामेक॒ इद्व॒शी न॒मो॒वृ॒धैर॑व॒स्युभिः॑ सु॒ते र॑ण

Rk 10

स्तु॒हि श्रु॒तं वि॑प॒श्चितं॒ हरी॒ यस्य॑ प्रस॒क्षिणा॑ गन्ता॑रा दा॒शुषो॑ गृ॒हं न॑म॒स्विनः॑

Rk 11

तू॒तु॒जा॒नो म॑हेम॒तेऽश्वे॑भिः प्रुषि॒तप्सु॑भिः आ या॑हि य॒ज्ञमा॒शुभिः॒ शमिद्धि ते॑

Rk 12

इन्द्र॑ शविष्ठ सत्पते र॒यिं गृ॒णत्सु॑ धारय श्रवः॑ सू॒रिभ्यो॑ अ॒मृतं॑ वसुत्व॒नम्

Rk 13

हवे॑ त्वा॒ सूर॒ उदि॑ते॒ हवे॑ म॒ध्यंदि॑ने दि॒वः जु॒षा॒ण इ॑न्द्र॒ सप्ति॑भिर्न॒ आ ग॑हि

Rk 14

आ तू ग॑हि॒ प्र तु द्र॑व॒ मत्स्वा॑ सु॒तस्य॒ गोम॑तः तन्तुं॑ तनुष्व पू॒र्व्यं यथा॑ वि॒दे

Rk 15

यच्छ॒क्रासि॑ परा॒वति॒ यद॑र्वा॒वति॑ वृत्रहन् यद्वा॑ समु॒द्रे अन्ध॑सोऽवि॒तेद॑सि

Rk 16

इन्द्रं॑ वर्धन्तु नो॒ गिर॒ इन्द्रं॑ सु॒तास॒ इन्द॑वः इन्द्रे॑ ह॒विष्म॑ती॒र्विशो॑ अराणिषुः

Rk 17

तमिद्विप्रा॑ अव॒स्यवः॑ प्र॒वत्व॑तीभिरू॒तिभिः॑ इन्द्रं॑ क्षो॒णीर॑वर्धयन्व॒या इ॑व

Rk 18

त्रिक॑द्रुकेषु॒ चेत॑नं दे॒वासो॑ य॒ज्ञम॑त्नत तमिद्व॑र्धन्तु नो॒ गिरः॑ स॒दावृ॑धम्

Rk 19

स्तो॒ता यत्ते॒ अनु॑व्रत उ॒क्थान्यृ॑तु॒था द॒धे शुचिः॑ पाव॒क उ॑च्यते॒ सो अद्भु॑तः

Rk 20

तदिद्रु॒द्रस्य॑ चेतति य॒ह्वं प्र॒त्नेषु॒ धाम॑सु मनो॒ यत्रा॒ वि तद्द॒धुर्विचे॑तसः

Rk 21

यदि॑ मे स॒ख्यमा॒वर॑ इ॒मस्य॑ पा॒ह्यन्ध॑सः येन॒ विश्वा॒ अति॒ द्विषो॒ अता॑रिम

Rk 22

क॒दा त॑ इन्द्र गिर्वणः स्तो॒ता भ॑वाति॒ शंत॑मः क॒दा नो॒ गव्ये॒ अश्व्ये॒ वसौ॑ दधः

Rk 23

उ॒त ते॒ सुष्टु॑ता॒ हरी॒ वृष॑णा वहतो॒ रथ॑म् अ॒जु॒र्यस्य॑ म॒दिन्त॑मं॒ यमीम॑हे

Rk 24

तमी॑महे पुरुष्टु॒तं य॒ह्वं प्र॒त्नाभि॑रू॒तिभिः॑ नि ब॒र्हिषि॑ प्रि॒ये स॑द॒दध॑ द्वि॒ता

Rk 25

वर्ध॑स्वा॒ सु पु॑रुष्टुत॒ ऋषि॑ष्टुताभिरू॒तिभिः॑ धु॒क्षस्व॑ पि॒प्युषी॒मिष॒मवा॑ च नः

Rk 26

इन्द्र॒ त्वम॑वि॒तेद॑सी॒त्था स्तु॑व॒तो अ॑द्रिवः ऋ॒तादि॑यर्मि ते॒ धियं॑ मनो॒युज॑म्

Rk 27

इ॒ह त्या स॑ध॒माद्या॑ युजा॒नः सोम॑पीतये हरी॑ इन्द्र प्र॒तद्व॑सू अ॒भि स्व॑र

Rk 28

अ॒भि स्व॑रन्तु॒ ये तव॑ रु॒द्रासः॑ सक्षत॒ श्रिय॑म् उ॒तो म॒रुत्व॑ती॒र्विशो॑ अ॒भि प्रयः॑

Rk 29

इ॒मा अ॑स्य॒ प्रतू॑र्तयः प॒दं जु॑षन्त॒ यद्दि॒वि नाभा॑ य॒ज्ञस्य॒ सं द॑धु॒र्यथा॑ वि॒दे

Rk 30

अ॒यं दी॒र्घाय॒ चक्ष॑से॒ प्राचि॑ प्रय॒त्य॑ध्व॒रे मिमी॑ते य॒ज्ञमा॑नु॒षग्वि॒चक्ष्य॑

Rk 31

वृषा॒यमि॑न्द्र ते॒ रथ॑ उ॒तो ते॒ वृष॑णा॒ हरी॑ वृषा॒ त्वं श॑तक्रतो॒ वृषा॒ हवः॑

Rk 32

वृषा॒ ग्रावा॒ वृषा॒ मदो॒ वृषा॒ सोमो॑ अ॒यं सु॒तः वृषा॑ य॒ज्ञो यमिन्व॑सि॒ वृषा॒ हवः॑

Rk 33

वृषा॑ त्वा॒ वृष॑णं हुवे॒ वज्रि॑ञ्चि॒त्राभि॑रू॒तिभिः॑ वा॒वन्थ॒ हि प्रति॑ष्टुतिं॒ वृषा॒ हवः॑