Sukta 41

Rk 1

आ तू न॑ इन्द्र म॒द्र्य॑ग्घुवा॒नः सोम॑पीतये हरि॑भ्यां याह्यद्रिवः

Rk 2

स॒त्तो होता॑ न ऋ॒त्विय॑स्तिस्ति॒रे ब॒र्हिरा॑नु॒षक् अयु॑ज्रन्प्रा॒तरद्र॑यः

Rk 3

इ॒मा ब्रह्म॑ ब्रह्मवाहः क्रि॒यन्त॒ आ ब॒र्हिः सी॑द वी॒हि शू॑र पुरो॒ळाश॑म्

Rk 4

रा॒र॒न्धि सव॑नेषु ण ए॒षु स्तोमे॑षु वृत्रहन् उ॒क्थेष्वि॑न्द्र गिर्वणः

Rk 5

म॒तयः॑ सोम॒पामु॒रुं रि॒हन्ति॒ शव॑स॒स्पति॑म् इन्द्रं॑ व॒त्सं न मा॒तरः॑

Rk 6

स म॑न्दस्वा॒ ह्यन्ध॑सो॒ राध॑से त॒न्वा॑ म॒हे न स्तो॒तारं॑ नि॒दे क॑रः

Rk 7

व॒यमि॑न्द्र त्वा॒यवो॑ ह॒विष्म॑न्तो जरामहे उ॒त त्वम॑स्म॒युर्व॑सो

Rk 8

मारे अ॒स्मद्वि मु॑मुचो॒ हरि॑प्रिया॒र्वाङ्या॑हि इन्द्र॑ स्वधावो॒ मत्स्वे॒ह

Rk 9

अ॒र्वाञ्चं॑ त्वा सु॒खे रथे॒ वह॑तामिन्द्र के॒शिना॑ घृ॒तस्नू॑ ब॒र्हिरा॒सदे॑