Sukta 40

Rk 1

इन्द्र॑ त्वा वृष॒भं व॒यं सु॒ते सोमे॑ हवामहे स पा॑हि॒ मध्वो॒ अन्ध॑सः

Rk 2

इन्द्र॑ क्रतु॒विदं॑ सु॒तं सोमं॑ हर्य पुरुष्टुत पिबा वृ॑षस्व॒ तातृ॑पिम्

Rk 3

इन्द्र॒ प्र णो॑ धि॒तावा॑नं य॒ज्ञं विश्वे॑भिर्दे॒वेभिः॑ ति॒र स्त॑वान विश्पते

Rk 4

इन्द्र॒ सोमाः॑ सु॒ता इ॒मे तव॒ प्र य॑न्ति सत्पते क्षयं॑ च॒न्द्रास॒ इन्द॑वः

Rk 5

द॒धि॒ष्वा ज॒ठरे॑ सु॒तं सोम॑मिन्द्र॒ वरे॑ण्यम् तव॑ द्यु॒क्षास॒ इन्द॑वः

Rk 6

गिर्व॑णः पा॒हि नः॑ सु॒तं मधो॒र्धारा॑भिरज्यसे इन्द्र॒ त्वादा॑त॒मिद्यशः॑

Rk 7

अ॒भि द्यु॒म्नानि॑ व॒निन॒ इन्द्रं॑ सचन्ते॒ अक्षि॑ता पी॒त्वी सोम॑स्य वावृधे

Rk 8

अ॒र्वा॒वतो॑ न॒ आ ग॑हि परा॒वत॑श्च वृत्रहन् इ॒मा जु॑षस्व नो॒ गिरः॑

Rk 9

यद॑न्त॒रा प॑रा॒वत॑मर्वा॒वतं॑ च हू॒यसे॑ इन्द्रे॒ह तत॒ आ ग॑हि