Sukta 5

Rk 1

आ त्वेता॒ नि षी॑द॒तेन्द्र॑म॒भि प्र गा॑यत सखा॑यः॒ स्तोम॑वाहसः

Rk 2

पु॒रू॒तमं॑ पुरू॒णामीशा॑नं॒ वार्या॑णाम् इन्द्रं॒ सोमे॒ सचा॑ सु॒ते

Rk 3

स घा॑ नो॒ योग॒ आ भु॑व॒त्स रा॒ये स पुरं॑ध्याम् गम॒द्वाजे॑भि॒रा स नः॑

Rk 4

यस्य॑ सं॒स्थे न वृ॒ण्वते॒ हरी॑ स॒मत्सु॒ शत्र॑वः तस्मा॒ इन्द्रा॑य गायत

Rk 5

सु॒त॒पाव्ने॑ सु॒ता इ॒मे शुच॑यो यन्ति वी॒तये॑ सोमा॑सो॒ दध्या॑शिरः

Rk 6

त्वं सु॒तस्य॑ पी॒तये॑ स॒द्यो वृ॒द्धो अ॑जायथाः इन्द्र॒ ज्यैष्ठ्या॑य सुक्रतो

Rk 7

आ त्वा॑ विशन्त्वा॒शवः॒ सोमा॑स इन्द्र गिर्वणः शं ते॑ सन्तु॒ प्रचे॑तसे

Rk 8

त्वां स्तोमा॑ अवीवृध॒न्त्वामु॒क्था श॑तक्रतो त्वां व॑र्धन्तु नो॒ गिरः॑

Rk 9

अक्षि॑तोतिः सनेदि॒मं वाज॒मिन्द्रः॑ सह॒स्रिण॑म् यस्मि॒न्विश्वा॑नि॒ पौंस्या॑

Rk 10

मा नो॒ मर्ता॑ अ॒भि द्रु॑हन्त॒नूना॑मिन्द्र गिर्वणः ईशा॑नो यवया व॒धम्