Sukta 4

Rk 1

सु॒रू॒प॒कृ॒त्नुमू॒तये॑ सु॒दुघा॑मिव गो॒दुहे॑ जु॒हू॒मसि॒ द्यवि॑द्यवि

Rk 2

उप॑ नः॒ सव॒ना ग॑हि॒ सोम॑स्य सोमपाः पिब गो॒दा इद्रे॒वतो॒ मदः॑

Rk 3

अथा॑ ते॒ अन्त॑मानां वि॒द्याम॑ सुमती॒नाम् मा नो॒ अति॑ ख्य॒ आ ग॑हि

Rk 4

परे॑हि॒ विग्र॒मस्तृ॑त॒मिन्द्रं॑ पृच्छा विप॒श्चित॑म् यस्ते॒ सखि॑भ्य॒ आ वर॑म्

Rk 5

उ॒त ब्रु॑वन्तु नो॒ निदो॒ निर॒न्यत॑श्चिदारत दधा॑ना॒ इन्द्र॒ इद्दुवः॑

Rk 6

उ॒त नः॑ सु॒भगाँ॑ अ॒रिर्वो॒चेयु॑र्दस्म कृ॒ष्टयः॑ स्यामेदिन्द्र॑स्य॒ शर्म॑णि

Rk 7

एमा॒शुमा॒शवे॑ भर यज्ञ॒श्रियं॑ नृ॒माद॑नम् प॒त॒यन्म॑न्द॒यत्स॑खम्

Rk 8

अ॒स्य पी॒त्वा श॑तक्रतो घ॒नो वृ॒त्राणा॑मभवः प्रावो॒ वाजे॑षु वा॒जिन॑म्

Rk 9

तं त्वा॒ वाजे॑षु वा॒जिनं॑ वा॒जया॑मः शतक्रतो धना॑नामिन्द्र सा॒तये॑

Rk 10

यो रा॒यो॒३॒॑ऽवनि॑र्म॒हान्त्सु॑पा॒रः सु॑न्व॒तः सखा॑ तस्मा॒ इन्द्रा॑य गायत