Sukta 6

Rk 1

यु॒ञ्जन्ति॑ ब्र॒ध्नम॑रु॒षं चर॑न्तं॒ परि॑ त॒स्थुषः॑ रोच॑न्ते रोच॒ना दि॒वि

Rk 2

यु॒ञ्जन्त्य॑स्य॒ काम्या॒ हरी॒ विप॑क्षसा॒ रथे॑ शोणा॑ धृ॒ष्णू नृ॒वाह॑सा

Rk 3

के॒तुं कृ॒ण्वन्न॑के॒तवे॒ पेशो॑ मर्या अपे॒शसे॑ समु॒षद्भि॑रजायथाः

Rk 4

आदह॑ स्व॒धामनु॒ पुन॑र्गर्भ॒त्वमे॑रि॒रे दधा॑ना॒ नाम॑ य॒ज्ञिय॑म्

Rk 5

वी॒ळु चि॑दारुज॒त्नुभि॒र्गुहा॑ चिदिन्द्र॒ वह्नि॑भिः अवि॑न्द उ॒स्रिया॒ अनु॑

Rk 6

दे॒व॒यन्तो॒ यथा॑ म॒तिमच्छा॑ वि॒दद्व॑सुं॒ गिरः॑ म॒हाम॑नूषत श्रु॒तम्

Rk 7

इन्द्रे॑ण॒ सं हि दृक्ष॑से संजग्मा॒नो अबि॑भ्युषा म॒न्दू स॑मा॒नव॑र्चसा

Rk 8

अ॒न॒व॒द्यैर॒भिद्यु॑भिर्म॒खः सह॑स्वदर्चति ग॒णैरिन्द्र॑स्य॒ काम्यैः॑

Rk 9

अतः॑ परिज्म॒न्ना ग॑हि दि॒वो वा॑ रोच॒नादधि॑ सम॑स्मिन्नृञ्जते॒ गिरः॑

Rk 10

इ॒तो वा॑ सा॒तिमीम॑हे दि॒वो वा॒ पार्थि॑वा॒दधि॑ इन्द्रं॑ म॒हो वा॒ रज॑सः