Sukta 3

Rk 1

अश्वि॑ना॒ यज्व॑री॒रिषो॒ द्रव॑त्पाणी॒ शुभ॑स्पती पुरु॑भुजा चन॒स्यत॑म्

Rk 2

अश्वि॑ना॒ पुरु॑दंससा॒ नरा॒ शवी॑रया धि॒या धिष्ण्या॒ वन॑तं॒ गिरः॑

Rk 3

दस्रा॑ यु॒वाक॑वः सु॒ता नास॑त्या वृ॒क्तब॑र्हिषः आ या॑तं रुद्रवर्तनी

Rk 4

इन्द्रा या॑हि चित्रभानो सु॒ता इ॒मे त्वा॒यवः॑ अण्वी॑भि॒स्तना॑ पू॒तासः॑

Rk 5

इन्द्रा या॑हि धि॒येषि॒तो विप्र॑जूतः सु॒ताव॑तः उप॒ ब्रह्मा॑णि वा॒घतः॑

Rk 6

इन्द्रा या॑हि॒ तूतु॑जान॒ उप॒ ब्रह्मा॑णि हरिवः सु॒ते द॑धिष्व न॒श्चनः॑

Rk 7

ओमा॑सश्चर्षणीधृतो॒ विश्वे॑ देवास॒ आ ग॑त दा॒श्वांसो॑ दा॒शुषः॑ सु॒तम्

Rk 8

विश्वे॑ दे॒वासो॑ अ॒प्तुरः॑ सु॒तमा ग॑न्त॒ तूर्ण॑यः उ॒स्रा इ॑व॒ स्वस॑राणि

Rk 9

विश्वे॑ दे॒वासो॑ अ॒स्रिध॒ एहि॑मायासो अ॒द्रुहः॑ मेधं॑ जुषन्त॒ वह्न॑यः

Rk 10

पा॒व॒का नः॒ सर॑स्वती॒ वाजे॑भिर्वा॒जिनी॑वती य॒ज्ञं व॑ष्टु धि॒याव॑सुः

Rk 11

चो॒द॒यि॒त्री सू॒नृता॑नां॒ चेत॑न्ती सुमती॒नाम् य॒ज्ञं द॑धे॒ सर॑स्वती

Rk 12

म॒हो अर्णः॒ सर॑स्वती॒ प्र चे॑तयति के॒तुना॑ धियो॒ विश्वा॒ वि रा॑जति