Sukta 2
Mandala 1 · 9 rks
9 rks · free forever
Listen to this section
Uses your saved HI voice · Narration settings
Rk 1
वाय॒वा या॑हि दर्शते॒मे सोमा॒ अरं॑कृताः तेषां॑ पाहि श्रु॒धी हव॑म्
Rk 2
वाय॑ उ॒क्थेभि॑र्जरन्ते॒ त्वामच्छा॑ जरि॒तारः॑ सु॒तसो॑मा अह॒र्विदः॑
Rk 3
वायो॒ तव॑ प्रपृञ्च॒ती धेना॑ जिगाति दा॒शुषे॑ उ॒रू॒ची सोम॑पीतये
Rk 4
इन्द्र॑वायू इ॒मे सु॒ता उप॒ प्रयो॑भि॒रा ग॑तम् इन्द॑वो वामु॒शन्ति॒ हि
Rk 5
वाय॒विन्द्र॑श्च चेतथः सु॒तानां॑ वाजिनीवसू तावा या॑त॒मुप॑ द्र॒वत्
Rk 6
वाय॒विन्द्र॑श्च सुन्व॒त आ या॑त॒मुप॑ निष्कृ॒तम् म॒क्ष्वि१॒॑त्था धि॒या न॑रा
Rk 7
मि॒त्रं हु॑वे पू॒तद॑क्षं॒ वरु॑णं च रि॒शाद॑सम् धियं॑ घृ॒ताचीं॒ साध॑न्ता
Rk 8
ऋ॒तेन॑ मित्रावरुणावृतावृधावृतस्पृशा क्रतुं॑ बृ॒हन्त॑माशाथे
Rk 9
क॒वी नो॑ मि॒त्रावरु॑णा तुविजा॒ता उ॑रु॒क्षया॑ दक्षं॑ दधाते अ॒पस॑म्