Sukta 27

Rk 1

अश्वं॒ न त्वा॒ वार॑वन्तं व॒न्दध्या॑ अ॒ग्निं नमो॑भिः स॒म्राज॑न्तमध्व॒राणा॑म्

Rk 2

स घा॑ नः सू॒नुः शव॑सा पृ॒थुप्र॑गामा सु॒शेवः॑ मी॒ढ्वाँ अ॒स्माकं॑ बभूयात्

Rk 3

स नो॑ दू॒राच्चा॒साच्च॒ नि मर्त्या॑दघा॒योः पा॒हि सद॒मिद्वि॒श्वायुः॑

Rk 4

इ॒ममू॒ षु त्वम॒स्माकं॑ स॒निं गा॑य॒त्रं नव्यां॑सम् अग्ने॑ दे॒वेषु॒ प्र वो॑चः

Rk 5

आ नो॑ भज पर॒मेष्वा वाजे॑षु मध्य॒मेषु॑ शिक्षा॒ वस्वो॒ अन्त॑मस्य

Rk 6

वि॒भ॒क्तासि॑ चित्रभानो॒ सिन्धो॑रू॒र्मा उ॑पा॒क आ स॒द्यो दा॒शुषे॑ क्षरसि

Rk 7

यम॑ग्ने पृ॒त्सु मर्त्य॒मवा॒ वाजे॑षु॒ यं जु॒नाः स यन्ता॒ शश्व॑ती॒रिषः॑

Rk 8

नकि॑रस्य सहन्त्य पर्ये॒ता कय॑स्य चित् वाजो॑ अस्ति श्र॒वाय्यः॑

Rk 9

स वाजं॑ वि॒श्वच॑र्षणि॒रर्व॑द्भिरस्तु॒ तरु॑ता विप्रे॑भिरस्तु॒ सनि॑ता

Rk 10

जरा॑बोध॒ तद्वि॑विड्ढि वि॒शेवि॑शे य॒ज्ञिया॑य स्तोमं॑ रु॒द्राय॒ दृशी॑कम्

Rk 11

स नो॑ म॒हाँ अ॑निमा॒नो धू॒मके॑तुः पुरुश्च॒न्द्रः धि॒ये वाजा॑य हिन्वतु

Rk 12

स रे॒वाँ इ॑व वि॒श्पति॒र्दैव्यः॑ के॒तुः शृ॑णोतु नः उ॒क्थैर॒ग्निर्बृ॒हद्भा॑नुः

Rk 13

नमो॑ म॒हद्भ्यो॒ नमो॑ अर्भ॒केभ्यो॒ नमो॒ युव॑भ्यो॒ नम॑ आशि॒नेभ्यः॑ यजा॑म दे॒वान्यदि॑ श॒क्नवा॑म॒ मा ज्याय॑सः॒ शंस॒मा वृ॑क्षि देवाः