Sukta 28

Rk 1

यत्र॒ ग्रावा॑ पृ॒थुबु॑ध्न ऊ॒र्ध्वो भव॑ति॒ सोत॑वे उ॒लूख॑लसुताना॒मवेद्वि॑न्द्र जल्गुलः

Rk 2

यत्र॒ द्वावि॑व ज॒घना॑धिषव॒ण्या॑ कृ॒ता उ॒लूख॑लसुताना॒मवेद्वि॑न्द्र जल्गुलः

Rk 3

यत्र॒ नार्य॑पच्य॒वमु॑पच्य॒वं च॒ शिक्ष॑ते उ॒लूख॑लसुताना॒मवेद्वि॑न्द्र जल्गुलः

Rk 4

यत्र॒ मन्थां॑ विब॒ध्नते॑ र॒श्मीन्यमि॑त॒वा इ॑व उ॒लूख॑लसुताना॒मवेद्वि॑न्द्र जल्गुलः

Rk 5

यच्चि॒द्धि त्वं गृ॒हेगृ॑ह॒ उलू॑खलक यु॒ज्यसे॑ इ॒ह द्यु॒मत्त॑मं वद॒ जय॑तामिव दुन्दु॒भिः

Rk 6

उ॒त स्म॑ ते वनस्पते॒ वातो॒ वि वा॒त्यग्र॒मित् अथो॒ इन्द्रा॑य॒ पात॑वे सु॒नु सोम॑मुलूखल

Rk 7

आ॒य॒जी वा॑ज॒सात॑मा॒ ता ह्यु१॒॑च्चा वि॑जर्भृ॒तः हरी॑ इ॒वान्धां॑सि॒ बप्स॑ता

Rk 8

ता नो॑ अ॒द्य व॑नस्पती ऋ॒ष्वावृ॒ष्वेभिः॑ सो॒तृभिः॑ इन्द्रा॑य॒ मधु॑मत्सुतम्

Rk 9

उच्छि॒ष्टं च॒म्वो॑र्भर॒ सोमं॑ प॒वित्र॒ आ सृ॑ज नि धे॑हि॒ गोरधि॑ त्व॒चि