Sukta 26

Rk 1

वसि॑ष्वा॒ हि मि॑येध्य॒ वस्त्रा॑ण्यूर्जां पते सेमं नो॑ अध्व॒रं य॑ज

Rk 2

नि नो॒ होता॒ वरे॑ण्यः॒ सदा॑ यविष्ठ॒ मन्म॑भिः अग्ने॑ दि॒वित्म॑ता॒ वचः॑

Rk 3

आ हि ष्मा॑ सू॒नवे॑ पि॒तापिर्यज॑त्या॒पये॑ सखा॒ सख्ये॒ वरे॑ण्यः

Rk 4

आ नो॑ ब॒र्ही रि॒शाद॑सो॒ वरु॑णो मि॒त्रो अ॑र्य॒मा सीद॑न्तु॒ मनु॑षो यथा

Rk 5

पूर्व्य॑ होतर॒स्य नो॒ मन्द॑स्व स॒ख्यस्य॑ च इ॒मा उ॒ षु श्रु॑धी॒ गिरः॑

Rk 6

यच्चि॒द्धि शश्व॑ता॒ तना॑ दे॒वंदे॑वं॒ यजा॑महे त्वे इद्धू॑यते ह॒विः

Rk 7

प्रि॒यो नो॑ अस्तु वि॒श्पति॒र्होता॑ म॒न्द्रो वरे॑ण्यः प्रि॒याः स्व॒ग्नयो॑ व॒यम्

Rk 8

स्व॒ग्नयो॒ हि वार्यं॑ दे॒वासो॑ दधि॒रे च॑ नः स्व॒ग्नयो॑ मनामहे

Rk 9

अथा॑ न उ॒भये॑षा॒ममृ॑त॒ मर्त्या॑नाम् मि॒थः स॑न्तु॒ प्रश॑स्तयः

Rk 10

विश्वे॑भिरग्ने अ॒ग्निभि॑रि॒मं य॒ज्ञमि॒दं वचः॑ चनो॑ धाः सहसो यहो