Sukta 25

Rk 1

यच्चि॒द्धि ते॒ विशो॑ यथा॒ प्र दे॑व वरुण व्र॒तम् मि॒नी॒मसि॒ द्यवि॑द्यवि

Rk 2

मा नो॑ व॒धाय॑ ह॒त्नवे॑ जिहीळा॒नस्य॑ रीरधः मा हृ॑णा॒नस्य॑ म॒न्यवे॑

Rk 3

वि मृ॑ळी॒काय॑ ते॒ मनो॑ र॒थीरश्वं॒ न संदि॑तम् गी॒र्भिर्व॑रुण सीमहि

Rk 4

परा॒ हि मे॒ विम॑न्यवः॒ पत॑न्ति॒ वस्य॑इष्टये वयो॒ न व॑स॒तीरुप॑

Rk 5

क॒दा क्ष॑त्र॒श्रियं॒ नर॒मा वरु॑णं करामहे मृ॒ळी॒कायो॑रु॒चक्ष॑सम्

Rk 6

तदित्स॑मा॒नमा॑शाते॒ वेन॑न्ता॒ न प्र यु॑च्छतः धृ॒तव्र॑ताय दा॒शुषे॑

Rk 7

वेदा॒ यो वी॒नां प॒दम॒न्तरि॑क्षेण॒ पत॑ताम् वेद॑ ना॒वः स॑मु॒द्रियः॑

Rk 8

वेद॑ मा॒सो धृ॒तव्र॑तो॒ द्वाद॑श प्र॒जाव॑तः वेदा॒ य उ॑प॒जाय॑ते

Rk 9

वेद॒ वात॑स्य वर्त॒निमु॒रोर्ऋ॒ष्वस्य॑ बृह॒तः वेदा॒ ये अ॒ध्यास॑ते

Rk 10

नि ष॑साद धृ॒तव्र॑तो॒ वरु॑णः प॒स्त्या॒३॒॑स्वा साम्रा॑ज्याय सु॒क्रतुः॑

Rk 11

अतो॒ विश्वा॒न्यद्भु॑ता चिकि॒त्वाँ अ॒भि प॑श्यति कृ॒तानि॒ या च॒ कर्त्वा॑

Rk 12

स नो॑ वि॒श्वाहा॑ सु॒क्रतु॑रादि॒त्यः सु॒पथा॑ करत् प्र ण॒ आयूं॑षि तारिषत्

Rk 13

बिभ्र॑द्द्रा॒पिं हि॑र॒ण्ययं॒ वरु॑णो वस्त नि॒र्णिज॑म् परि॒ स्पशो॒ नि षे॑दिरे

Rk 14

न यं दिप्स॑न्ति दि॒प्सवो॒ न द्रुह्वा॑णो॒ जना॑नाम् न दे॒वम॒भिमा॑तयः

Rk 15

उ॒त यो मानु॑षे॒ष्वा यश॑श्च॒क्रे असा॒म्या अ॒स्माक॑मु॒दरे॒ष्वा

Rk 16

परा॑ मे यन्ति धी॒तयो॒ गावो॒ न गव्यू॑ती॒रनु॑ इ॒च्छन्ती॑रुरु॒चक्ष॑सम्

Rk 17

सं नु वो॑चावहै॒ पुन॒र्यतो॑ मे॒ मध्वाभृ॑तम् होते॑व॒ क्षद॑से प्रि॒यम्

Rk 18

दर्शं॒ नु वि॒श्वद॑र्शतं॒ दर्शं॒ रथ॒मधि॒ क्षमि॑ ए॒ता जु॑षत मे॒ गिरः॑

Rk 19

इ॒मं मे॑ वरुण श्रुधी॒ हव॑म॒द्या च॑ मृळय त्वाम॑व॒स्युरा च॑के

Rk 20

त्वं विश्व॑स्य मेधिर दि॒वश्च॒ ग्मश्च॑ राजसि स याम॑नि॒ प्रति॑ श्रुधि

Rk 21

उदु॑त्त॒मं मु॑मुग्धि नो॒ वि पाशं॑ मध्य॒मं चृ॑त अवा॑ध॒मानि॑ जी॒वसे॑