Sukta 17
Mandala 1 · 9 rks
9 rks · free forever
Listen to this section
Uses your saved HI voice · Narration settings
Rk 1
इन्द्रा॒वरु॑णयोर॒हं स॒म्राजो॒रव॒ आ वृ॑णे ता नो॑ मृळात ई॒दृशे॑
Rk 2
गन्ता॑रा॒ हि स्थोऽव॑से॒ हवं॒ विप्र॑स्य॒ माव॑तः ध॒र्तारा॑ चर्षणी॒नाम्
Rk 3
अ॒नु॒का॒मं त॑र्पयेथा॒मिन्द्रा॑वरुण रा॒य आ ता वां॒ नेदि॑ष्ठमीमहे
Rk 4
यु॒वाकु॒ हि शची॑नां यु॒वाकु॑ सुमती॒नाम् भू॒याम॑ वाज॒दाव्ना॑म्
Rk 5
इन्द्रः॑ सहस्र॒दाव्नां॒ वरु॑णः॒ शंस्या॑नाम् क्रतु॑र्भवत्यु॒क्थ्यः॑
Rk 6
तयो॒रिदव॑सा व॒यं स॒नेम॒ नि च॑ धीमहि स्यादु॒त प्र॒रेच॑नम्
Rk 7
इन्द्रा॑वरुण वाम॒हं हु॒वे चि॒त्राय॒ राध॑से अ॒स्मान्त्सु जि॒ग्युष॑स्कृतम्
Rk 8
इन्द्रा॑वरुण॒ नू नु वां॒ सिषा॑सन्तीषु धी॒ष्वा अ॒स्मभ्यं॒ शर्म॑ यच्छतम्
Rk 9
प्र वा॑मश्नोतु सुष्टु॒तिरिन्द्रा॑वरुण॒ यां हु॒वे यामृ॒धाथे॑ स॒धस्तु॑तिम्