Sukta 15

Rk 1

इन्द्र॒ सोमं॒ पिब॑ ऋ॒तुना त्वा॑ विश॒न्त्विन्द॑वः म॒त्स॒रास॒स्तदो॑कसः

Rk 2

मरु॑तः॒ पिब॑त ऋ॒तुना॑ पो॒त्राद्य॒ज्ञं पु॑नीतन यू॒यं हि ष्ठा सु॑दानवः

Rk 3

अ॒भि य॒ज्ञं गृ॑णीहि नो॒ ग्नावो॒ नेष्टः॒ पिब॑ ऋ॒तुना॑ त्वं हि र॑त्न॒धा असि॑

Rk 4

अग्ने॑ दे॒वाँ इ॒हा व॑ह सा॒दया॒ योनि॑षु त्रि॒षु परि॑ भूष॒ पिब॑ ऋ॒तुना॑

Rk 5

ब्राह्म॑णादिन्द्र॒ राध॑सः॒ पिबा॒ सोम॑मृ॒तूँरनु॑ तवेद्धि स॒ख्यमस्तृ॑तम्

Rk 6

यु॒वं दक्षं॑ धृतव्रत॒ मित्रा॑वरुण दू॒ळभ॑म् ऋ॒तुना॑ य॒ज्ञमा॑शाथे

Rk 7

द्र॒वि॒णो॒दा द्रवि॑णसो॒ ग्राव॑हस्तासो अध्व॒रे य॒ज्ञेषु॑ दे॒वमी॑ळते

Rk 8

द्र॒वि॒णो॒दा द॑दातु नो॒ वसू॑नि॒ यानि॑ शृण्वि॒रे दे॒वेषु॒ ता व॑नामहे

Rk 9

द्र॒वि॒णो॒दाः पि॑पीषति जु॒होत॒ प्र च॑ तिष्ठत ने॒ष्ट्रादृ॒तुभि॑रिष्यत

Rk 10

यत्त्वा॑ तु॒रीय॑मृ॒तुभि॒र्द्रवि॑णोदो॒ यजा॑महे अध॑ स्मा नो द॒दिर्भ॑व

Rk 11

अश्वि॑ना॒ पिब॑तं॒ मधु॒ दीद्य॑ग्नी शुचिव्रता ऋ॒तुना॑ यज्ञवाहसा

Rk 12

गार्ह॑पत्येन सन्त्य ऋ॒तुना॑ यज्ञ॒नीर॑सि दे॒वान्दे॑वय॒ते य॑ज