Sukta 14

Rk 1

ऐभि॑रग्ने॒ दुवो॒ गिरो॒ विश्वे॑भिः॒ सोम॑पीतये दे॒वेभि॑र्याहि॒ यक्षि॑ च

Rk 2

आ त्वा॒ कण्वा॑ अहूषत गृ॒णन्ति॑ विप्र ते॒ धियः॑ दे॒वेभि॑रग्न॒ आ ग॑हि

Rk 3

इ॒न्द्र॒वा॒यू बृह॒स्पतिं॑ मि॒त्राग्निं पू॒षणं॒ भग॑म् आ॒दि॒त्यान्मारु॑तं ग॒णम्

Rk 4

प्र वो॑ भ्रियन्त॒ इन्द॑वो मत्स॒रा मा॑दयि॒ष्णवः॑ द्र॒प्सा मध्व॑श्चमू॒षदः॑

Rk 5

ईळ॑ते॒ त्वाम॑व॒स्यवः॒ कण्वा॑सो वृ॒क्तब॑र्हिषः ह॒विष्म॑न्तो अरं॒कृतः॑

Rk 6

घृ॒तपृ॑ष्ठा मनो॒युजो॒ ये त्वा॒ वह॑न्ति॒ वह्न॑यः आ दे॒वान्त्सोम॑पीतये

Rk 7

तान्यज॑त्राँ ऋता॒वृधोऽग्ने॒ पत्नी॑वतस्कृधि मध्वः॑ सुजिह्व पायय

Rk 8

ये यज॑त्रा॒ य ईड्या॒स्ते ते॑ पिबन्तु जि॒ह्वया॑ मधो॑रग्ने॒ वष॑ट्कृति

Rk 9

आकीं॒ सूर्य॑स्य रोच॒नाद्विश्वा॑न्दे॒वाँ उ॑ष॒र्बुधः॑ विप्रो॒ होते॒ह व॑क्षति

Rk 10

विश्वे॑भिः सो॒म्यं मध्वग्न॒ इन्द्रे॑ण वा॒युना॑ पिबा॑ मि॒त्रस्य॒ धाम॑भिः

Rk 11

त्वं होता॒ मनु॑र्हि॒तोऽग्ने॑ य॒ज्ञेषु॑ सीदसि सेमं नो॑ अध्व॒रं य॑ज

Rk 12

यु॒क्ष्वा ह्यरु॑षी॒ रथे॑ ह॒रितो॑ देव रो॒हितः॑ ताभि॑र्दे॒वाँ इ॒हा व॑ह