Sukta 13

Rk 1

सुस॑मिद्धो न॒ आ व॑ह दे॒वाँ अ॑ग्ने ह॒विष्म॑ते होतः॑ पावक॒ यक्षि॑ च

Rk 2

मधु॑मन्तं तनूनपाद्य॒ज्ञं दे॒वेषु॑ नः कवे अ॒द्या कृ॑णुहि वी॒तये॑

Rk 3

नरा॒शंस॑मि॒ह प्रि॒यम॒स्मिन्य॒ज्ञ उप॑ ह्वये मधु॑जिह्वं हवि॒ष्कृत॑म्

Rk 4

अग्ने॑ सु॒खत॑मे॒ रथे॑ दे॒वाँ ई॑ळि॒त आ व॑ह असि॒ होता॒ मनु॑र्हितः

Rk 5

स्तृ॒णी॒त ब॒र्हिरा॑नु॒षग्घृ॒तपृ॑ष्ठं मनीषिणः यत्रा॒मृत॑स्य॒ चक्ष॑णम्

Rk 6

वि श्र॑यन्तामृता॒वृधो॒ द्वारो॑ दे॒वीर॑स॒श्चतः॑ अ॒द्या नू॒नं च॒ यष्ट॑वे

Rk 7

नक्तो॒षासा॑ सु॒पेश॑सा॒स्मिन्य॒ज्ञ उप॑ ह्वये इ॒दं नो॑ ब॒र्हिरा॒सदे॑

Rk 8

ता सु॑जि॒ह्वा उप॑ ह्वये॒ होता॑रा॒ दैव्या॑ क॒वी य॒ज्ञं नो॑ यक्षतामि॒मम्

Rk 9

इळा॒ सर॑स्वती म॒ही ति॒स्रो दे॒वीर्म॑यो॒भुवः॑ ब॒र्हिः सी॑दन्त्व॒स्रिधः॑

Rk 10

इ॒ह त्वष्टा॑रमग्रि॒यं वि॒श्वरू॑प॒मुप॑ ह्वये अ॒स्माक॑मस्तु॒ केव॑लः

Rk 11

अव॑ सृजा वनस्पते॒ देव॑ दे॒वेभ्यो॑ ह॒विः प्र दा॒तुर॑स्तु॒ चेत॑नम्

Rk 12

स्वाहा॑ य॒ज्ञं कृ॑णोत॒नेन्द्रा॑य॒ यज्व॑नो गृ॒हे तत्र॑ दे॒वाँ उप॑ ह्वये