Sukta 12

Rk 1

अ॒ग्निं दू॒तं वृ॑णीमहे॒ होता॑रं वि॒श्ववे॑दसम् अ॒स्य य॒ज्ञस्य॑ सु॒क्रतु॑म्

Rk 2

अ॒ग्निम॑ग्निं॒ हवी॑मभिः॒ सदा॑ हवन्त वि॒श्पति॑म् ह॒व्य॒वाहं॑ पुरुप्रि॒यम्

Rk 3

अग्ने॑ दे॒वाँ इ॒हा व॑ह जज्ञा॒नो वृ॒क्तब॑र्हिषे असि॒ होता॑ न॒ ईड्यः॑

Rk 4

ताँ उ॑श॒तो वि बो॑धय॒ यद॑ग्ने॒ यासि॑ दू॒त्य॑म् दे॒वैरा स॑त्सि ब॒र्हिषि॑

Rk 5

घृता॑हवन दीदिवः॒ प्रति॑ ष्म॒ रिष॑तो दह अग्ने॒ त्वं र॑क्ष॒स्विनः॑

Rk 6

अ॒ग्निना॒ग्निः समि॑ध्यते क॒विर्गृ॒हप॑ति॒र्युवा॑ ह॒व्य॒वाड्जु॒ह्वा॑स्यः

Rk 7

क॒विम॒ग्निमुप॑ स्तुहि स॒त्यध॑र्माणमध्व॒रे दे॒वम॑मीव॒चात॑नम्

Rk 8

यस्त्वाम॑ग्ने ह॒विष्प॑तिर्दू॒तं दे॑व सप॒र्यति॑ तस्य॑ स्म प्रावि॒ता भ॑व

Rk 9

यो अ॒ग्निं दे॒ववी॑तये ह॒विष्माँ॑ आ॒विवा॑सति तस्मै॑ पावक मृळय

Rk 10

स नः॑ पावक दीदि॒वोऽग्ने॑ दे॒वाँ इ॒हा व॑ह उप॑ य॒ज्ञं ह॒विश्च॑ नः

Rk 11

स नः॒ स्तवा॑न॒ आ भ॑र गाय॒त्रेण॒ नवी॑यसा र॒यिं वी॒रव॑ती॒मिष॑म्

Rk 12

अग्ने॑ शु॒क्रेण॑ शो॒चिषा॒ विश्वा॑भिर्दे॒वहू॑तिभिः इ॒मं स्तोमं॑ जुषस्व नः