Adhyaya 15

Verse 1

शल्ययुधिष्ठिरयोर्युद्धम्।। 1 ।। सञ्जय उवाच। ततः सेना तव विभो मद्रराजपुरस्कृता। पुनरभ्यद्रवत्पार्थान्वेगेन महता रणे।।

śalyayudhiṣṭhirayoryuddham|| 1 || sañjaya uvāca| tataḥ senā tava vibho madrarājapuraskṛtā| punarabhyadravatpārthānvegena mahatā raṇe||

Verse 2

पीडितास्तावकाः सर्वे प्रधावन्तो रणोत्कटाः। क्षणेन चैव पार्थांस्ते बहुत्वात्समलोडयन्।।

pīḍitāstāvakāḥ sarve pradhāvanto raṇotkaṭāḥ| kṣaṇena caiva pārthāṃste bahutvātsamaloḍayan||

Verse 3

ते वध्यमानाः समरे पाण्डवा नावतस्थिरे। क्षणेनैव महाराज पश्यतोः कृष्णपार्थयोः।।

te vadhyamānāḥ samare pāṇḍavā nāvatasthire| kṣaṇenaiva mahārāja paśyatoḥ kṛṣṇapārthayoḥ||

Verse 4

ततो धनञ्जयः क्रुद्धः कृपं सह पदानुगैः। अवाकिरच्छरौघेण कृतवर्माणमेव च।।

tato dhanañjayaḥ kruddhaḥ kṛpaṃ saha padānugaiḥ| avākiraccharaugheṇa kṛtavarmāṇameva ca||

Verse 5

शकुनिं सहदेवस्तु सहसैन्यमवाकिरत्। नकुलः पार्श्वतः स्थित्वा मद्रराजमयोधयत्।।

śakuniṃ sahadevastu sahasainyamavākirat| nakulaḥ pārśvataḥ sthitvā madrarājamayodhayat||

Verse 6

द्रौपदेया नरेन्द्राश्च भूयिष्ठान्समवारयन्। द्रोणपुत्रं च पाञ्चाल्यः शिखण्डी समवारयत्।।

draupadeyā narendrāśca bhūyiṣṭhānsamavārayan| droṇaputraṃ ca pāñcālyaḥ śikhaṇḍī samavārayat||

Verse 7

भीमसेनस्तु राजानं गदापाणिरवारयत्। शल्यं तु सह सैन्येन कुन्तीपुत्रो युधिष्ठिरः।।

bhīmasenastu rājānaṃ gadāpāṇiravārayat| śalyaṃ tu saha sainyena kuntīputro yudhiṣṭhiraḥ||

Verse 8

ततः समभवद्युद्धं संसक्तं तत्रतत्र ह। तावकानां परेषां च सङ्ग्रामेष्वनिवर्तिनाम्।।

tataḥ samabhavadyuddhaṃ saṃsaktaṃ tatratatra ha| tāvakānāṃ pareṣāṃ ca saṅgrāmeṣvanivartinām||

Verse 9

तत्र पश्यामहे कर्म शल्यस्यातिमहद्रणे। यदेकः सर्वसैन्यानि पाण्डवानामयोधयत्।।

tatra paśyāmahe karma śalyasyātimahadraṇe| yadekaḥ sarvasainyāni pāṇḍavānāmayodhayat||

Verse 10

व्यदृश्यत तदा शल्यो युधिष्ठिरसमीपतः। क्रूरश्चन्द्रमसोऽभ्याशे शनैश्चर इव ग्रहः।।

vyadṛśyata tadā śalyo yudhiṣṭhirasamīpataḥ| krūraścandramaso'bhyāśe śanaiścara iva grahaḥ||

Verse 11

पीडयित्वा तु राजानं शरैराशीविषोपमैः। अभ्यधावत्पुनर्भीमं शरवर्षैरवाकिरत्।।

pīḍayitvā tu rājānaṃ śarairāśīviṣopamaiḥ| abhyadhāvatpunarbhīmaṃ śaravarṣairavākirat||

Verse 12

तस्य तल्लाघवं दृष्ट्वा तथैव च कृतास्त्रताम्। अपूजयन्ननीकानि परेषां तावकानि च।।

tasya tallāghavaṃ dṛṣṭvā tathaiva ca kṛtāstratām| apūjayannanīkāni pareṣāṃ tāvakāni ca||

Verse 13

पीड्यमानास्तु शल्येन पाण्डवा भृशाविक्षताः। प्राद्रवन्त रणं हित्वा क्रोशमाने युधिष्ठिरे।।

pīḍyamānāstu śalyena pāṇḍavā bhṛśāvikṣatāḥ| prādravanta raṇaṃ hitvā krośamāne yudhiṣṭhire||

Verse 14

वध्यमानेष्वनीकेषु मद्रराजेन पाण्डवः। अमर्षवशमापन्नो धर्मराजो युधिष्ठिरः।।

vadhyamāneṣvanīkeṣu madrarājena pāṇḍavaḥ| amarṣavaśamāpanno dharmarājo yudhiṣṭhiraḥ||

Verse 15

ततः पौरुषमास्थाय मद्रराजमताडयत्। जयो वाऽस्तु वधो वेति कृतबुद्धिर्महारथः।। मुहूर्तमिव तान्हत्वा नर्दमीने युधिष्ठिरे इति क.ख.पाठः।।

tataḥ pauruṣamāsthāya madrarājamatāḍayat| jayo vā'stu vadho veti kṛtabuddhirmahārathaḥ|| muhūrtamiva tānhatvā nardamīne yudhiṣṭhire iti ka.kha.pāṭhaḥ||

Verse 16

समाहूयाब्रवीत्सर्वान्भ्रातॄन्कृष्णं च पाण्डवः।।

samāhūyābravītsarvānbhrātṝnkṛṣṇaṃ ca pāṇḍavaḥ||

Verse 17

भीष्मो द्रोणश्च कर्णश्च ये चान्ये पृथिवीक्षितः। कौरवार्थे पराक्रान्ताः सङ्ग्रामे निधनं गताः। यथाभागं यथोत्साहं भवन्तः कृतपौरुषाः।।

bhīṣmo droṇaśca karṇaśca ye cānye pṛthivīkṣitaḥ| kauravārthe parākrāntāḥ saṅgrāme nidhanaṃ gatāḥ| yathābhāgaṃ yathotsāhaṃ bhavantaḥ kṛtapauruṣāḥ||

Verse 18

भागोऽवशिष्ट एकोऽयं मम शल्यो महारथः। सोऽहमद्य युधा जेतुमाशंसे मद्रकाधिपम्।।

bhāgo'vaśiṣṭa eko'yaṃ mama śalyo mahārathaḥ| so'hamadya yudhā jetumāśaṃse madrakādhipam||

Verse 19

तत्र यन्मानसं मह्यं तत्सर्वं निगदामि वः। चक्ररक्षाविमौ वीरौ मम माद्रवतीसुतौ।।

tatra yanmānasaṃ mahyaṃ tatsarvaṃ nigadāmi vaḥ| cakrarakṣāvimau vīrau mama mādravatīsutau||

Verse 20

अजेयौ वासवेनापि समरे शूरसम्मतौ। साध्विमौ मातुलं युद्धे क्षत्रधर्मपुरस्कृतौ।।

ajeyau vāsavenāpi samare śūrasammatau| sādhvimau mātulaṃ yuddhe kṣatradharmapuraskṛtau||

Verse 21

मदर्थे प्रतियुध्येतां मानार्हौ सत्यसङ्गरौ। मां वा शल्यो रणे हन्ता तं वाऽहं भद्रमस्तु वः। इति सत्यामिमां वाणीं लोकवीरा निबोधत।।

madarthe pratiyudhyetāṃ mānārhau satyasaṅgarau| māṃ vā śalyo raṇe hantā taṃ vā'haṃ bhadramastu vaḥ| iti satyāmimāṃ vāṇīṃ lokavīrā nibodhata||

Verse 22

योत्स्येऽहं मातुलेनाद्य क्षात्रधर्मेण पार्थिवाः। स्वमंशमभिसन्धाय विजयायेतराय वा।।

yotsye'haṃ mātulenādya kṣātradharmeṇa pārthivāḥ| svamaṃśamabhisandhāya vijayāyetarāya vā||

Verse 23

तस्य मेऽप्यधिकं शस्त्रं सर्वोपकरणानि च। संयुज्यन्तां रथे क्षिप्रं शास्त्रवद्रथयोजकैः।।

tasya me'pyadhikaṃ śastraṃ sarvopakaraṇāni ca| saṃyujyantāṃ rathe kṣipraṃ śāstravadrathayojakaiḥ||

Verse 24

शैनेयो दक्षिणं चक्रं धृष्टद्युम्नस्तथोत्तरम्। पृष्ठगोपो भवत्वद्य मम पार्थो धनञ्जयः।।

śaineyo dakṣiṇaṃ cakraṃ dhṛṣṭadyumnastathottaram| pṛṣṭhagopo bhavatvadya mama pārtho dhanañjayaḥ||

Verse 25

पुरःसरो ममाद्यास्तु भीमः शस्त्रभृतां वरः। एवमभ्यधिकः शल्याद्भविष्यामि महामृधे।।

puraḥsaro mamādyāstu bhīmaḥ śastrabhṛtāṃ varaḥ| evamabhyadhikaḥ śalyādbhaviṣyāmi mahāmṛdhe||

Verse 26

एवमुक्तास्तथा चक्रुस्तदा राज्ञः प्रियैषिणः।।

evamuktāstathā cakrustadā rājñaḥ priyaiṣiṇaḥ||

Verse 27

ततः प्रहर्षः सैव्यानां पुनरासीत्तदाः मृधे। पाञ्चालानां सोमकानां मात्स्यानां च विशेषतः।।

tataḥ praharṣaḥ saivyānāṃ punarāsīttadāḥ mṛdhe| pāñcālānāṃ somakānāṃ mātsyānāṃ ca viśeṣataḥ||

Verse 28

प्रतिज्ञातं च सङ्ग्रामे धर्मराजस्य पूजयन्। ततः शङ्खांश्च भेरीश्च शतशश्चैव पुष्करान्। अवादयन्त पाञ्चालाः सिंहनादांश्च नेदिरे।।

pratijñātaṃ ca saṅgrāme dharmarājasya pūjayan| tataḥ śaṅkhāṃśca bherīśca śataśaścaiva puṣkarān| avādayanta pāñcālāḥ siṃhanādāṃśca nedire||

Verse 29

तेऽभ्यधावन्त संरब्धा मद्रराजं तरस्विनम्। महता हर्षजेनाथ नादेन कुरुपुङ्गवाः।।

te'bhyadhāvanta saṃrabdhā madrarājaṃ tarasvinam| mahatā harṣajenātha nādena kurupuṅgavāḥ||

Verse 30

हादेन गजघण्टानां शङ्खानां निनदेन च। तूर्यशब्देन महता नादयन्तश्च मेदिनीम्।।

hādena gajaghaṇṭānāṃ śaṅkhānāṃ ninadena ca| tūryaśabdena mahatā nādayantaśca medinīm||

Verse 31

तान्प्रत्यगृह्णात्पुत्रस्ते मद्रराजश्च वीर्यवान्। महामेघानिव बहूञ्शैलावस्तोदयावुभौ।।

tānpratyagṛhṇātputraste madrarājaśca vīryavān| mahāmeghāniva bahūñśailāvastodayāvubhau||

Verse 32

शल्यस्तु समरश्लाघी धर्मराजमरिन्दमम्। ववर्ष शरवर्षेण शम्बरं मघवा इव।।

śalyastu samaraślāghī dharmarājamarindamam| vavarṣa śaravarṣeṇa śambaraṃ maghavā iva||

Verse 33

तथैव कुरुराजोऽपि प्रगृह्य रुचिरं धनुः। द्रोणोपदेशान्विविधान्दर्शयानो महामनाः। ववर्ष शरवर्षाणि चित्रं लघु च सुष्ठु च।।

tathaiva kururājo'pi pragṛhya ruciraṃ dhanuḥ| droṇopadeśānvividhāndarśayāno mahāmanāḥ| vavarṣa śaravarṣāṇi citraṃ laghu ca suṣṭhu ca||

Verse 34

न चास्य विवरं कश्चिद्ददर्श चरतो रणे।।

na cāsya vivaraṃ kaściddadarśa carato raṇe||

Verse 35

तावुभौ विविधैर्बाणैस्ततक्षाते परस्परम्। शार्दूलावामिषप्रेप्सू पराक्रान्ताविवाहवे।।

tāvubhau vividhairbāṇaistatakṣāte parasparam| śārdūlāvāmiṣaprepsū parākrāntāvivāhave||

Verse 36

भीमस्तु तव पुत्रेण युद्धशौण्डेन सङ्गतः।।

bhīmastu tava putreṇa yuddhaśauṇḍena saṅgataḥ||

Verse 37

पाञ्चाल्यः सात्यकिश्चैव माद्रीपुत्रौ च पाण्डवौ। शकुनिप्रमुखान्वीरान्प्रत्यगृह्णन्समन्ततः।।

pāñcālyaḥ sātyakiścaiva mādrīputrau ca pāṇḍavau| śakunipramukhānvīrānpratyagṛhṇansamantataḥ||

Verse 38

तदासीत्तुमुलं युद्धं पुनरेव जयैषिणाम्। तावकानां परेषां च राजन्दुर्मन्त्रिते तव।।

tadāsīttumulaṃ yuddhaṃ punareva jayaiṣiṇām| tāvakānāṃ pareṣāṃ ca rājandurmantrite tava||

Verse 39

दुर्योधनस्तु भीमस्य शरेणानतपर्वणा। चिच्छेदादिश्य सङ्ग्रामे ध्वजं हेमपरिष्कृतम्।।

duryodhanastu bhīmasya śareṇānataparvaṇā| cicchedādiśya saṅgrāme dhvajaṃ hemapariṣkṛtam||

Verse 40

स किङ्किणीकजालेन महता चारुदर्शनः। पपात रुचिरः सिंहो भीमसेनस्य पश्यतः।।

sa kiṅkiṇīkajālena mahatā cārudarśanaḥ| papāta ruciraḥ siṃho bhīmasenasya paśyataḥ||

Verse 41

पुनश्चास्य धनुश्चित्रं गजराजकरोपमम्। क्षुरेण शितधारेण प्रचकर्त नराधिपः।।

punaścāsya dhanuścitraṃ gajarājakaropamam| kṣureṇa śitadhāreṇa pracakarta narādhipaḥ||

Verse 42

स च्छिन्नधन्वा तेजस्वी रथशक्त्या सुतं तव। बिभेदोरसि विक्रम्य स रथोपस्थ आविशत्।। ।। इति श्रीमन्महाभारते शल्यपर्वणि शल्यवधपर्वणि अष्टादशदिवसयुद्धे पञ्चदशोऽध्यायः।। 15 ।।

sa cchinnadhanvā tejasvī rathaśaktyā sutaṃ tava| bibhedorasi vikramya sa rathopastha āviśat|| || iti śrīmanmahābhārate śalyaparvaṇi śalyavadhaparvaṇi aṣṭādaśadivasayuddhe pañcadaśo'dhyāyaḥ|| 15 ||

Verse 43

तस्मिन्मोहमनुप्राप्ते पुनरेव वृकोदरः। यन्तुरेव शिरः कायात्क्षुरप्रेणाहरत्तदा।।

tasminmohamanuprāpte punareva vṛkodaraḥ| yantureva śiraḥ kāyātkṣurapreṇāharattadā||

Verse 44

हतसूता हयास्तस्य रथमादाय भारत। व्यद्रवन्त दिशो राजन्हाहाकारस्तदाऽभवत्।।

hatasūtā hayāstasya rathamādāya bhārata| vyadravanta diśo rājanhāhākārastadā'bhavat||

Verse 45

तमभ्यधावंस्त्राणार्थं द्रोणपुत्रो महारथः। कृपश्च कृतवर्मां च पुत्रं ते हि परीप्सवः।।

tamabhyadhāvaṃstrāṇārthaṃ droṇaputro mahārathaḥ| kṛpaśca kṛtavarmāṃ ca putraṃ te hi parīpsavaḥ||

Verse 46

तस्मिन्विलुलिते सैन्ये त्रस्तांस्तस्य पदानुगान्। गाण्डीवधन्वा विस्फार्य धनुस्तानहनच्छरैः।।

tasminvilulite sainye trastāṃstasya padānugān| gāṇḍīvadhanvā visphārya dhanustānahanaccharaiḥ||

Verse 47

युधिष्ठिरस्तु मद्रेशमभ्यधावदमर्षितः। स्वयं सन्नोदयन्नश्वान्दन्तवर्णान्मनोजवान्।।

yudhiṣṭhirastu madreśamabhyadhāvadamarṣitaḥ| svayaṃ sannodayannaśvāndantavarṇānmanojavān||

Verse 48

तत्राश्चर्यपमश्याम कुन्तीपुत्रे युधिष्ठिरे। पुरा भूत्वा मृदुर्दान्तो यत्तदा दारुणोऽभवत्।।

tatrāścaryapamaśyāma kuntīputre yudhiṣṭhire| purā bhūtvā mṛdurdānto yattadā dāruṇo'bhavat||

Verse 49

विवृताक्षश्च कौन्तेयो वेपमानश्च मन्युना। चिच्छेद योधान्निशितैः शरैः शतसहस्रशः।।

vivṛtākṣaśca kaunteyo vepamānaśca manyunā| ciccheda yodhānniśitaiḥ śaraiḥ śatasahasraśaḥ||

Verse 50

यांयां प्रत्युद्ययौ सेनां तांतां ज्येष्ठः स पाण्डवः। शरैरपातयद्राजन्गिरीन्वज्रैरिवोत्तमैः।। रथशक्त्या रथस्थया शक्त्या।।

yāṃyāṃ pratyudyayau senāṃ tāṃtāṃ jyeṣṭhaḥ sa pāṇḍavaḥ| śarairapātayadrājangirīnvajrairivottamaiḥ|| rathaśaktyā rathasthayā śaktyā||

Verse 51

साश्वसूतध्वजरथान्रथिनः पातयन्बहून्। अक्रीडदेको बलवान्पवनस्तोयदानिव।।

sāśvasūtadhvajarathānrathinaḥ pātayanbahūn| akrīḍadeko balavānpavanastoyadāniva||

Verse 52

साश्वारोहांश्च तुरगान्पत्तींश्चैव सहस्रधा। व्यपोथयत सङ्ग्रामे क्रुद्धो रुद्रः पशूनिव।।

sāśvārohāṃśca turagānpattīṃścaiva sahasradhā| vyapothayata saṅgrāme kruddho rudraḥ paśūniva||

Verse 53

शून्यमायोधनं कृत्वा शरवर्षैः समन्ततः। अभ्यद्रवत मद्रेशं तिष्ठतिष्ठेति चाब्रवीत्।।

śūnyamāyodhanaṃ kṛtvā śaravarṣaiḥ samantataḥ| abhyadravata madreśaṃ tiṣṭhatiṣṭheti cābravīt||

Verse 54

तस्य तच्चरितं दृष्ट्वा संग्रामे भीमकर्मणः। वित्रेसुस्तावकाः सर्वे शल्यस्त्वेनं समभ्ययात्।।

tasya taccaritaṃ dṛṣṭvā saṃgrāme bhīmakarmaṇaḥ| vitresustāvakāḥ sarve śalyastvenaṃ samabhyayāt||

Verse 55

ततस्तौ भृशसङ्क्रुद्धौ प्रध्माय सलिलोद्भवौ। समाहूय तदाऽन्योन्यं भर्त्सयन्तौ समीयतुः।।

tatastau bhṛśasaṅkruddhau pradhmāya salilodbhavau| samāhūya tadā'nyonyaṃ bhartsayantau samīyatuḥ||

Verse 56

शल्यस्तु शरवर्षेण पीडयामास पाण्डवम्। मद्रराजं तु कौन्तेयः शरवर्षैरवाकिरत्।।

śalyastu śaravarṣeṇa pīḍayāmāsa pāṇḍavam| madrarājaṃ tu kaunteyaḥ śaravarṣairavākirat||

Verse 57

अदृश्येतां तदा राजन्कङ्कपत्रिभिराचितौ। उद्भिन्नरुधिरौ शूरौ मद्रराजयुधिष्ठिरौ। पुष्पिताविव रेजाते वने शाल्मलिकिंशुकौ।।

adṛśyetāṃ tadā rājankaṅkapatribhirācitau| udbhinnarudhirau śūrau madrarājayudhiṣṭhirau| puṣpitāviva rejāte vane śālmalikiṃśukau||

Verse 58

दीव्यमानौ महात्मानौ प्राणद्यूतेन दुर्मदौ। दृष्ट्वा सर्वाणि सैन्यानि नाध्यवस्यंस्तयोर्जयम्।।

dīvyamānau mahātmānau prāṇadyūtena durmadau| dṛṣṭvā sarvāṇi sainyāni nādhyavasyaṃstayorjayam||

Verse 59

हत्वा मद्राधिपं पार्थो भोक्ष्यतेऽद्य वसुन्धराम्। शल्यो वा पाण्डवं हत्वा दद्याद्दुर्योधनाय गाम्।।

hatvā madrādhipaṃ pārtho bhokṣyate'dya vasundharām| śalyo vā pāṇḍavaṃ hatvā dadyādduryodhanāya gām||

Verse 60

इतीव निश्चयो नाभूद्योधानां तत्र भारत। प्रदक्षिणमभूत्सर्वं धर्मराजस्य युध्यतः।।

itīva niścayo nābhūdyodhānāṃ tatra bhārata| pradakṣiṇamabhūtsarvaṃ dharmarājasya yudhyataḥ||

Verse 61

ततः शरशतं शल्यो मुमोचाशु युधिष्ठिरे। धनुश्चास्य शिताग्रेण बाणेन निरुकृन्तत।।

tataḥ śaraśataṃ śalyo mumocāśu yudhiṣṭhire| dhanuścāsya śitāgreṇa bāṇena nirukṛntata||

Verse 62

सोऽन्यत्कार्मुकमादाय शल्यं शरशतैस्त्रिभिः। अविध्यत्कार्मुकं चास्य क्षुरेण निरकृन्तत।।

so'nyatkārmukamādāya śalyaṃ śaraśataistribhiḥ| avidhyatkārmukaṃ cāsya kṣureṇa nirakṛntata||

Verse 63

अथास्य निजघानाश्वांश्चतुरो नतपर्वभिः। द्वाभ्यामतिशिताग्राभ्यामुभौ तत्पार्ष्णिसारथी।।

athāsya nijaghānāśvāṃścaturo nataparvabhiḥ| dvābhyāmatiśitāgrābhyāmubhau tatpārṣṇisārathī||

Verse 64

ततोऽस्य दीप्यमानेन पीतेन निशितेन च। प्रमुखे वर्तमानस्य भल्लेनापाहरद्वृजम्।।

tato'sya dīpyamānena pītena niśitena ca| pramukhe vartamānasya bhallenāpāharadvṛjam||

Verse 65

ततः प्रभग्नं तत्सैन्यं दौर्योधनमरिन्दम।।

tataḥ prabhagnaṃ tatsainyaṃ dauryodhanamarindama||

Verse 66

ततो मद्राधिपं द्रौणिरभ्यधावत्तथा कृतम्। आरोप्य चैनं स्वरथं त्वरमाणः प्रदुद्रुवे।।

tato madrādhipaṃ drauṇirabhyadhāvattathā kṛtam| āropya cainaṃ svarathaṃ tvaramāṇaḥ pradudruve||

Verse 67

मुहूर्तमिव तौ गत्वा नर्दमाने युधिष्ठिरे। गत्वा ततो मद्रपतिरन्यं स्यन्दनमास्थितः।। यां यामभ्यगमत्सेनां तां तां व्यनीनशत्। न्यपातयत कौन्तेयो गिरीन्वज्र इवोत्तमान्। इति क.ख.पाठः।।

muhūrtamiva tau gatvā nardamāne yudhiṣṭhire| gatvā tato madrapatiranyaṃ syandanamāsthitaḥ|| yāṃ yāmabhyagamatsenāṃ tāṃ tāṃ vyanīnaśat| nyapātayata kaunteyo girīnvajra ivottamān| iti ka.kha.pāṭhaḥ||

Verse 68

विधिवत्कल्पितं शुभ्रं महाम्बुदनिनादिनम्। सज्जयन्त्रोपकरणं द्विषतां रोमहर्षणम्।।

vidhivatkalpitaṃ śubhraṃ mahāmbudaninādinam| sajjayantropakaraṇaṃ dviṣatāṃ romaharṣaṇam||

Verse 69

तथान्यद्धनुरादाय बलवान्वेगवत्तरम्।। युधिष्ठिरं मद्रपतिर्भित्त्वा सिंह इवानदत्।।

tathānyaddhanurādāya balavānvegavattaram|| yudhiṣṭhiraṃ madrapatirbhittvā siṃha ivānadat||

Verse 70

ततः स शरवर्षेण पर्जन्य इव वृष्टिमान्। अभ्यवर्षदमेयात्मा क्षत्रियान्क्षत्रियर्षभः।।

tataḥ sa śaravarṣeṇa parjanya iva vṛṣṭimān| abhyavarṣadameyātmā kṣatriyānkṣatriyarṣabhaḥ||

Verse 71

सात्यकिं दशभिर्विद्ध्वा भीमसेनं त्रिभिः शरैः। सहदेवं त्रिभिर्विद्धा युधिष्ठिरमपीडयत्।।

sātyakiṃ daśabhirviddhvā bhīmasenaṃ tribhiḥ śaraiḥ| sahadevaṃ tribhirviddhā yudhiṣṭhiramapīḍayat||

Verse 72

तांस्तानन्यान्महेष्वासान्साश्वान्सरथकूबरान्। अर्दयामास विशिखैरुल्काभिरिव कुञ्जरान्।।

tāṃstānanyānmaheṣvāsānsāśvānsarathakūbarān| ardayāmāsa viśikhairulkābhiriva kuñjarān||

Verse 73

कुञ्जरान्कुञ्जरारोहानश्वप्रयायिनः। रथांश्च रथिभिः सार्धं जघान रथिनां वरः।।

kuñjarānkuñjarārohānaśvaprayāyinaḥ| rathāṃśca rathibhiḥ sārdhaṃ jaghāna rathināṃ varaḥ||

Verse 74

बाहूंश्चिच्छेद तरसा सायुधान्केतनानि च। चकार च महीं योधैः स्तीर्णां वेदीं कुशैरिव।।

bāhūṃściccheda tarasā sāyudhānketanāni ca| cakāra ca mahīṃ yodhaiḥ stīrṇāṃ vedīṃ kuśairiva||

Verse 75

तथा तमरिसैन्यानि घ्नन्तं मृत्युमिवान्तकम्। परिवव्रुर्भृशं क्रुद्धाः पाण्डुपाञ्चालसोमकाः।।

tathā tamarisainyāni ghnantaṃ mṛtyumivāntakam| parivavrurbhṛśaṃ kruddhāḥ pāṇḍupāñcālasomakāḥ||