Adhyaya 55

Verse 1

अर्जुनेन संशप्तकानां वधः।। 1 ।। सञ्जय उवाच। प्रत्येत्याथ पुनर्जिष्णुर्जित्वा संशप्तकान्बभौ। वक्रानुवक्रगमनादङ्गारक इव ग्रहः।।

arjunena saṃśaptakānāṃ vadhaḥ|| 1 || sañjaya uvāca| pratyetyātha punarjiṣṇurjitvā saṃśaptakānbabhau| vakrānuvakragamanādaṅgāraka iva grahaḥ||

Verse 2

पार्थबाणहता राजन्नराश्वरथकुञ्जराः। विचेलुर्बभ्रमुर्नेशुः पेतुर्मम्लुश्च भारत।।

pārthabāṇahatā rājannarāśvarathakuñjarāḥ| vicelurbabhramurneśuḥ peturmamluśca bhārata||

Verse 3

धुर्यान्धुर्येतरान्सूतान्ध्वजांश्चपासिसायकान्। पाणीन्पाणिगताञ्शस्त्रान्बाहूनपि शिरांसि च।। ।। इति श्रीमन्महाभारते कर्णपर्वणि सप्तदशदिवसयुद्धे पञ्चपञ्चाशोऽध्यायः।। 55 ।।

dhuryāndhuryetarānsūtāndhvajāṃścapāsisāyakān| pāṇīnpāṇigatāñśastrānbāhūnapi śirāṃsi ca|| || iti śrīmanmahābhārate karṇaparvaṇi saptadaśadivasayuddhe pañcapañcāśo'dhyāyaḥ|| 55 ||

Verse 4

भल्लैः क्षुरैरर्धचन्द्रैर्वत्सदन्तैश्च पाण्डवः। चिच्छेदामित्रवीराणां समरे प्रतियुध्यताम्।।

bhallaiḥ kṣurairardhacandrairvatsadantaiśca pāṇḍavaḥ| cicchedāmitravīrāṇāṃ samare pratiyudhyatām||

Verse 5

तं प्रवीरास्त्वदीयानां नर्दमानाऽभिदुद्रुवुः। वासितार्थे युयुत्सन्तो वृषभा वृषभं यथा। निपतन्त्यर्जुनं शूराः शतशोऽथ सहस्रशः।। धुर्यान् श्रेष्ठान्। धुर्यगतानिति पाठे वाहान्।।

taṃ pravīrāstvadīyānāṃ nardamānā'bhidudruvuḥ| vāsitārthe yuyutsanto vṛṣabhā vṛṣabhaṃ yathā| nipatantyarjunaṃ śūrāḥ śataśo'tha sahasraśaḥ|| dhuryān śreṣṭhān| dhuryagatāniti pāṭhe vāhān||

Verse 6

तेषां तस्य च तद्युद्धमभवद्रोमहर्षणम्। त्रैलोक्यविजये यादृग्दैत्यानां सह वज्रिणा।।

teṣāṃ tasya ca tadyuddhamabhavadromaharṣaṇam| trailokyavijaye yādṛgdaityānāṃ saha vajriṇā||

Verse 7

तमविध्यत्त्रिभिर्बाणैर्दन्दशूकैरिवाहिभिः। उग्रायुधस्य तस्याशु शिरः कायादपाहरत्।। वासितार्थे स्त्रीनिमित्तम्।।

tamavidhyattribhirbāṇairdandaśūkairivāhibhiḥ| ugrāyudhasya tasyāśu śiraḥ kāyādapāharat|| vāsitārthe strīnimittam||

Verse 8

तेऽर्जुनं सर्वतः क्रुद्धा नानाशस्त्रैरवीवृषन्। मरुद्भिः प्रेरिता मेघा हिमवन्तमिवोष्णगे।। दन्दशूकैः दंशनशीलैः। अपाहरदर्जुन इति शेषः।।

te'rjunaṃ sarvataḥ kruddhā nānāśastrairavīvṛṣan| marudbhiḥ preritā meghā himavantamivoṣṇage|| dandaśūkaiḥ daṃśanaśīlaiḥ| apāharadarjuna iti śeṣaḥ||

Verse 9

अस्त्रैरस्त्राणिं संवार्य द्विषतां सर्वतोऽर्जुनः। सम्यगस्तैः शरैः सर्वानहितानहनद्बहून्।। उष्णगे ग्रीष्मे गते सति प्रावृषीत्यर्थः। उष्णे ग्रीध्मो गतोऽतीतो यत्र स उष्णगः कालविशेष इति विग्रहः।।

astrairastrāṇiṃ saṃvārya dviṣatāṃ sarvato'rjunaḥ| samyagastaiḥ śaraiḥ sarvānahitānahanadbahūn|| uṣṇage grīṣme gate sati prāvṛṣītyarthaḥ| uṣṇe grīdhmo gato'tīto yatra sa uṣṇagaḥ kālaviśeṣa iti vigrahaḥ||

Verse 10

छिन्नत्रिवेणुजङ्घेषान्हताश्वान्हतसारथीन्। विस्रस्तहस्ततूणीरान्विचक्रथकेतनान्।।

chinnatriveṇujaṅgheṣānhatāśvānhatasārathīn| visrastahastatūṇīrānvicakrathaketanān||

Verse 11

सञ्छिन्नरश्मियोक्त्राक्षान्व्यनुकर्षयुगान्रथान्। विध्वस्तसर्वसन्नाहान्बाणैश्चक्रेऽर्जुनस्त्वरन्।। अस्तैः क्षिप्तैः।।

sañchinnaraśmiyoktrākṣānvyanukarṣayugānrathān| vidhvastasarvasannāhānbāṇaiścakre'rjunastvaran|| astaiḥ kṣiptaiḥ||

Verse 12

ते रथास्तत्र विध्वस्ताः परार्द्व्या भान्त्यनेकशः। धनिनामिव वेश्मानि हतान्यग्न्यनिलाम्बुभिः।।

te rathāstatra vidhvastāḥ parārdvyā bhāntyanekaśaḥ| dhanināmiva veśmāni hatānyagnyanilāmbubhiḥ||

Verse 13

द्विपाः सम्भिन्नमर्माणो वज्राशनिसमैः शरैः। पेतुर्गिर्यग्रवेश्मानि वज्रवाताग्निभिर्यथा।।

dvipāḥ sambhinnamarmāṇo vajrāśanisamaiḥ śaraiḥ| peturgiryagraveśmāni vajravātāgnibhiryathā||

Verse 14

अनेकैश्च शिलाधौतैर्वज्रानलविषोपमैः। शरैर्निजघ्निवान्पार्थो महेन्द्र इव दानवान्।।

anekaiśca śilādhautairvajrānalaviṣopamaiḥ| śarairnijaghnivānpārtho mahendra iva dānavān||

Verse 15

सारोहास्तुरगाः पेतुर्बहवोऽर्जुनताडिताः। निर्जिह्वान्त्राः क्षितौ क्षीणा रुधिरार्द्राः सुदुर्दृशः।। अनुकर्षः रथाधस्थं दारु।।

sārohāsturagāḥ peturbahavo'rjunatāḍitāḥ| nirjihvāntrāḥ kṣitau kṣīṇā rudhirārdrāḥ sudurdṛśaḥ|| anukarṣaḥ rathādhasthaṃ dāru||

Verse 16

नराश्वनागा नाराचैः संस्यूताः सव्यसाचिना। बभ्रमुश्चस्खलुः पेतुर्नेदुर्मम्लुश्च मारिष।।

narāśvanāgā nārācaiḥ saṃsyūtāḥ savyasācinā| babhramuścaskhaluḥ peturnedurmamluśca māriṣa||

Verse 17

महार्हवर्माभरणा नानारूपाम्बरायुधाः। सरथाश्वद्विपा वीरा हताः पार्थेन शेरते।।

mahārhavarmābharaṇā nānārūpāmbarāyudhāḥ| sarathāśvadvipā vīrā hatāḥ pārthena śerate||

Verse 18

निर्भयाः पुण्यकर्माणो विशिष्टाभिजनश्रुताः। गताः शरीरैर्वसुधामूर्जितैः कर्मभिर्दिवम्।।

nirbhayāḥ puṇyakarmāṇo viśiṣṭābhijanaśrutāḥ| gatāḥ śarīrairvasudhāmūrjitaiḥ karmabhirdivam||

Verse 19

अथार्जुनरथं वीरास्त्वदीयाः समभिद्रवन्। नानाजनपदाध्यक्षाः सगणा जातमन्यवः।।

athārjunarathaṃ vīrāstvadīyāḥ samabhidravan| nānājanapadādhyakṣāḥ sagaṇā jātamanyavaḥ||

Verse 20

उह्यमना रथाश्वेभैः पत्तयश्च जिघांसवः। समभ्यधावन्नस्यन्तो विविधं क्षिप्रमायुधम्।।

uhyamanā rathāśvebhaiḥ pattayaśca jighāṃsavaḥ| samabhyadhāvannasyanto vividhaṃ kṣipramāyudham||

Verse 21

तदायुधमहावर्षं क्षिप्तं योधमहाम्बुदैः। व्यधमन्निशितैर्बाणैः क्षिप्रमर्जुनमारुतः।।

tadāyudhamahāvarṣaṃ kṣiptaṃ yodhamahāmbudaiḥ| vyadhamanniśitairbāṇaiḥ kṣipramarjunamārutaḥ||

Verse 22

साश्वपत्तिद्विपरथं महाशस्त्रौघसम्प्लवम्।। सहसा सन्तितीर्षन्तं पार्थं शस्त्रास्त्रसेतुना।।

sāśvapattidviparathaṃ mahāśastraughasamplavam|| sahasā santitīrṣantaṃ pārthaṃ śastrāstrasetunā||

Verse 23

अथाब्रवीद्वासुदेवः पार्थ किं क्रीडसेऽनघ। संशप्तकान्प्रमथ्यैनांस्ततः कर्णवधे त्वर।।

athābravīdvāsudevaḥ pārtha kiṃ krīḍase'nagha| saṃśaptakānpramathyaināṃstataḥ karṇavadhe tvara||

Verse 24

तथेत्युक्त्वाऽर्जुनः कृष्णं शिष्टान्संशप्तकांस्तदा। क्षपयिष्यंस्तदा बाणैर्दैत्यानिन्द्र इवावधीत्।।

tathetyuktvā'rjunaḥ kṛṣṇaṃ śiṣṭānsaṃśaptakāṃstadā| kṣapayiṣyaṃstadā bāṇairdaityānindra ivāvadhīt||

Verse 25

आददत्सन्दधन्नेषृन्दृष्टः कैश्चिद्रणेऽर्जुनः। विमुञ्चन्वा शराञ्शीघ्रं दृश्यन्ते वै नरा हताः।।

ādadatsandadhanneṣṛndṛṣṭaḥ kaiścidraṇe'rjunaḥ| vimuñcanvā śarāñśīghraṃ dṛśyante vai narā hatāḥ||

Verse 26

आश्चर्यमिति गोविन्दो ब्रुवन्नश्वानचोदयत्। हंसांशुगौरास्ते सेनां हंसाः सर इवाविशन्।।

āścaryamiti govindo bruvannaśvānacodayat| haṃsāṃśugaurāste senāṃ haṃsāḥ sara ivāviśan||

Verse 27

ततः सङ्ग्रामभूमिं तां वर्तमाने जनक्षये। अवेक्षमाणो गोविन्दः सव्यसाचिनमब्रवीत्।।

tataḥ saṅgrāmabhūmiṃ tāṃ vartamāne janakṣaye| avekṣamāṇo govindaḥ savyasācinamabravīt||

Verse 28

एष पार्थ महारौद्रो वर्तते भरतक्षयः। पृथिव्यां पार्थिवानां वै दुर्योधनकृते महान्।।

eṣa pārtha mahāraudro vartate bharatakṣayaḥ| pṛthivyāṃ pārthivānāṃ vai duryodhanakṛte mahān||

Verse 29

पश्य भारत चापानि रुक्मपृष्ठानि धन्विनाम्। हतानामपविद्धानि कलापानिषुधींस्तथा।। निर्जिह्वान्त्राः निर्गताः जिह्वाः अन्त्राणि च येषां ते।।

paśya bhārata cāpāni rukmapṛṣṭhāni dhanvinām| hatānāmapaviddhāni kalāpāniṣudhīṃstathā|| nirjihvāntrāḥ nirgatāḥ jihvāḥ antrāṇi ca yeṣāṃ te||

Verse 30

जातरूपमयैः पुङ्खैः शरांश्च नतपर्वणः। तैलधौतांश्च नाराचान्निर्मुक्तानिव पन्नगान्।।

jātarūpamayaiḥ puṅkhaiḥ śarāṃśca nataparvaṇaḥ| tailadhautāṃśca nārācānnirmuktāniva pannagān||

Verse 31

आकीर्णांस्तोमरान्वाहांश्छत्रान्हेमविभूषितान्। चर्माणि चापविद्धानि रुक्मपृष्ठानि भारत।। कलापान् अलङ्कारान्।।

ākīrṇāṃstomarānvāhāṃśchatrānhemavibhūṣitān| carmāṇi cāpaviddhāni rukmapṛṣṭhāni bhārata|| kalāpān alaṅkārān||

Verse 32

सुवर्णविकृतान्प्रासाञ्शक्तीः कनकभूषिताः। जाम्बूनदमयैः पट्टैर्बद्धाश्च विपुला गदाः।।

suvarṇavikṛtānprāsāñśaktīḥ kanakabhūṣitāḥ| jāmbūnadamayaiḥ paṭṭairbaddhāśca vipulā gadāḥ||

Verse 33

जातरूपमयीश्चर्ष्टीः पट्टसान्हेमभूषितान्। दण्डैः कनकचित्रैश्च विप्रविद्धान्परश्वथान्।।

jātarūpamayīścarṣṭīḥ paṭṭasānhemabhūṣitān| daṇḍaiḥ kanakacitraiśca vipraviddhānparaśvathān||

Verse 34

परिघान्भिण्डिपालांश्च भुशुण्डीः कणपानपि। अयस्कुन्तांश्च पतितान्मुसलानि गुरूणि च।।

parighānbhiṇḍipālāṃśca bhuśuṇḍīḥ kaṇapānapi| ayaskuntāṃśca patitānmusalāni gurūṇi ca||

Verse 35

नानाविधानि शस्त्राणि प्रगृह्य जयगृद्धिनः। जीवन्त इव दृश्यन्ते गतसत्वास्तरस्विनः।।

nānāvidhāni śastrāṇi pragṛhya jayagṛddhinaḥ| jīvanta iva dṛśyante gatasatvāstarasvinaḥ||

Verse 36

गदाविमथितैर्गात्रैर्मुसलैर्भिन्नमस्तकान्। गजवाजिरथैः क्षुण्णान्पश्य योधान्सहस्रशः।।

gadāvimathitairgātrairmusalairbhinnamastakān| gajavājirathaiḥ kṣuṇṇānpaśya yodhānsahasraśaḥ||

Verse 37

मनुष्यगजवाजीनां शरशक्त्यृष्टितोमरैः। निस्त्रिंशैः पट्टसैः प्रासैर्नखरैर्लगुडैरपि।। आकीर्णान् सर्वतोविक्षिप्तान्।।

manuṣyagajavājīnāṃ śaraśaktyṛṣṭitomaraiḥ| nistriṃśaiḥ paṭṭasaiḥ prāsairnakharairlaguḍairapi|| ākīrṇān sarvatovikṣiptān||

Verse 38

शरीरैर्बहुघा छिन्नैः शोणितौघपरिप्लुतैः। गतासुभिरमित्रघ्न संवृता रणभूमयः।।

śarīrairbahughā chinnaiḥ śoṇitaughapariplutaiḥ| gatāsubhiramitraghna saṃvṛtā raṇabhūmayaḥ||

Verse 39

बाहुभिश्चन्दनादिग्धैः साङ्गदैः शुभभूषणैः। सतलत्रैः सकेयूरैर्भाति भारत मेदिनी।।

bāhubhiścandanādigdhaiḥ sāṅgadaiḥ śubhabhūṣaṇaiḥ| satalatraiḥ sakeyūrairbhāti bhārata medinī||

Verse 40

साङ्गुलित्रैर्भुजाग्रैश्च विप्रविद्वैरलङ्कृतैः। हस्तिहस्तोपमैश्छिन्नैरूरुभिश्च तरस्विनाम्।।

sāṅgulitrairbhujāgraiśca vipravidvairalaṅkṛtaiḥ| hastihastopamaiśchinnairūrubhiśca tarasvinām||

Verse 41

बद्धचूडामणिवरैः शिरोभिश्च सकुण्डलैः। निकृत्तैर्वृषभाक्षाणां शरीरैश्चापि सङ्घशः।।

baddhacūḍāmaṇivaraiḥ śirobhiśca sakuṇḍalaiḥ| nikṛttairvṛṣabhākṣāṇāṃ śarīraiścāpi saṅghaśaḥ||

Verse 42

गजवाजिमनुष्याणां शरशक्त्यृष्टितोमरैः। कबन्धैः शोणितादिग्धैश्छिन्नगात्रशिरोधरैः। भूर्भाति भरतश्रेष्ठ शान्ताग्निभिरिवाध्वरे।।

gajavājimanuṣyāṇāṃ śaraśaktyṛṣṭitomaraiḥ| kabandhaiḥ śoṇitādigdhaiśchinnagātraśirodharaiḥ| bhūrbhāti bharataśreṣṭha śāntāgnibhirivādhvare||

Verse 43

रथांश्च बहुधा भग्नान्हेमकिङ्किणिनः शुभान्। अश्वांश्च बुहधा पश्य शोणितेन परिप्लुतान्।।

rathāṃśca bahudhā bhagnānhemakiṅkiṇinaḥ śubhān| aśvāṃśca buhadhā paśya śoṇitena pariplutān||

Verse 44

अनुकर्षानुपासङ्गान्पताका विविधान्ध्वजान्। योधानां च महाशङ्खान्पाण्डुरांश्च प्रकीर्णकान्। निरस्तजिह्वान्मातङ्गाञ्शयानान्पर्वतोपमान्।।

anukarṣānupāsaṅgānpatākā vividhāndhvajān| yodhānāṃ ca mahāśaṅkhānpāṇḍurāṃśca prakīrṇakān| nirastajihvānmātaṅgāñśayānānparvatopamān||

Verse 45

वैजयन्तीर्विचित्राश्च हतांश्च गजयोधिनः। वारणानां परिस्तोमान्संयुक्तानेककम्बलान्।।

vaijayantīrvicitrāśca hatāṃśca gajayodhinaḥ| vāraṇānāṃ paristomānsaṃyuktānekakambalān||

Verse 46

विपाटितविचित्राश्च रूपचित्राः कुथास्तथा। भिन्नाश्च बहुधा घण्टाः पतद्भिश्चूर्णिता गजैः।।

vipāṭitavicitrāśca rūpacitrāḥ kuthāstathā| bhinnāśca bahudhā ghaṇṭāḥ patadbhiścūrṇitā gajaiḥ||

Verse 47

वैदूर्यमणिदण्डांश्च पतितांश्चाङ्कुशान्भुवि। अश्वानां च युगापीडान्रत्नचित्रानुरश्छदान्।।

vaidūryamaṇidaṇḍāṃśca patitāṃścāṅkuśānbhuvi| aśvānāṃ ca yugāpīḍānratnacitrānuraśchadān||

Verse 48

विद्धाः सादिध्वजाग्रेषु सुवर्णविकृताः कुथाः। विचित्रान्मणिचित्रांश्च जातरूपपरिष्कृतान्।।

viddhāḥ sādidhvajāgreṣu suvarṇavikṛtāḥ kuthāḥ| vicitrānmaṇicitrāṃśca jātarūpapariṣkṛtān||

Verse 49

अश्वास्तरपरिस्तोमान्राङ्कवान्पतितान्भुवि। चूडामणीन्नरेन्द्राणां विचित्राः काञ्चनस्रजः। छत्राणि चापविद्धानि चामरव्यजनानि च।।

aśvāstaraparistomānrāṅkavānpatitānbhuvi| cūḍāmaṇīnnarendrāṇāṃ vicitrāḥ kāñcanasrajaḥ| chatrāṇi cāpaviddhāni cāmaravyajanāni ca||

Verse 50

चन्द्रनक्षत्रभासैश्च वदनैश्चारुकुण्डलैः। क्लृप्तश्मश्रुभिरत्यर्थं वीराणां समलङ्कृतैः। वदनैः पश्य सञ्छन्नां महीं शोणितकर्दमाम्।।

candranakṣatrabhāsaiśca vadanaiścārukuṇḍalaiḥ| klṛptaśmaśrubhiratyarthaṃ vīrāṇāṃ samalaṅkṛtaiḥ| vadanaiḥ paśya sañchannāṃ mahīṃ śoṇitakardamām||

Verse 51

सजीवांश्च नरान्पश्य कूजमानान्समन्ततः। उपास्यमानांश्च बहून्न्यस्तशस्त्रैश्च भूपते। ज्ञातिभिश्च जलक्लिन्नान्रोदमानैर्मुहुर्मुहुः।।

sajīvāṃśca narānpaśya kūjamānānsamantataḥ| upāsyamānāṃśca bahūnnyastaśastraiśca bhūpate| jñātibhiśca jalaklinnānrodamānairmuhurmuhuḥ||

Verse 52

उत्क्रान्तानपरान्योधाञ्छादयित्वा तरस्विनः। पुनर्युद्धाय गच्छन्ति जये लुब्धाः प्रमन्यवः।।

utkrāntānaparānyodhāñchādayitvā tarasvinaḥ| punaryuddhāya gacchanti jaye lubdhāḥ pramanyavaḥ||

Verse 53

अपरे तत्रतत्रैव परिधावन्ति मानवाः। सन्निवृत्ताश्च ते शूरा दृष्टा चैतान्विचेतसः।।

apare tatratatraiva paridhāvanti mānavāḥ| sannivṛttāśca te śūrā dṛṣṭā caitānvicetasaḥ||

Verse 54

जलं त्यक्त्वा प्रधावन्ति क्रोशमानाः परस्परम्। जलं पीत्वा मृतान्पश्य पिबतोऽन्यांश्च भारत।।

jalaṃ tyaktvā pradhāvanti krośamānāḥ parasparam| jalaṃ pītvā mṛtānpaśya pibato'nyāṃśca bhārata||

Verse 55

परिष्वज्य प्रियानन्ये बान्धवान्बन्धुवत्सलाः। विसंज्ञान्समरे योधांस्तत्रतत्र महारणे।। वाजीनां शरीरैरिति सम्बन्धः। दैर्ध्यमार्षम्।।

pariṣvajya priyānanye bāndhavānbandhuvatsalāḥ| visaṃjñānsamare yodhāṃstatratatra mahāraṇe|| vājīnāṃ śarīrairiti sambandhaḥ| dairdhyamārṣam||

Verse 56

पश्यापरान्नरश्रेष्ठ सन्दष्टोष्ठपुटान्पुनः। भृकुटीकुटिलैर्वक्त्रैः प्रेक्षमाणान्महारणम्।।

paśyāparānnaraśreṣṭha sandaṣṭoṣṭhapuṭānpunaḥ| bhṛkuṭīkuṭilairvaktraiḥ prekṣamāṇānmahāraṇam||

Verse 57

एतत्तवैवानुरूपं कर्मार्जुन महाहवे। दिवि वा देवराजस्य त्वया यत्कृतमाहवे।।

etattavaivānurūpaṃ karmārjuna mahāhave| divi vā devarājasya tvayā yatkṛtamāhave||

Verse 58

सञ्जय उवाच। एवं तां दर्शयन्कृष्णो युद्धभूमिं किरीटिने। गच्छन्नेवाशृणोच्छब्दं दुर्योधनबले महत्।।

sañjaya uvāca| evaṃ tāṃ darśayankṛṣṇo yuddhabhūmiṃ kirīṭine| gacchannevāśṛṇocchabdaṃ duryodhanabale mahat||

Verse 59

शङ्खदुन्दुभिनिर्घोषं भेरीपणवनिःस्वनम्। रथाश्वनरनागानां पादशब्दांश्च दारुणान्।।

śaṅkhadundubhinirghoṣaṃ bherīpaṇavaniḥsvanam| rathāśvanaranāgānāṃ pādaśabdāṃśca dāruṇān||

Verse 60

प्रविश्य तद्बलं कृष्णस्तुरगैर्वातवेगितैः। पाण्ड्येनाभ्यर्दितं सैन्यं त्वदीयं वीक्ष्य विस्मितः।।

praviśya tadbalaṃ kṛṣṇasturagairvātavegitaiḥ| pāṇḍyenābhyarditaṃ sainyaṃ tvadīyaṃ vīkṣya vismitaḥ||

Verse 61

स हि नानाविधैर्बाणैरिष्वस्त्रप्रवरो युधि। न्यहनद्द्विषतां पूगान्गतासूनन्तको यथा।।

sa hi nānāvidhairbāṇairiṣvastrapravaro yudhi| nyahanaddviṣatāṃ pūgāngatāsūnantako yathā||

Verse 62

गजवाजिमनुष्याणां शरीराणि शितैः शरैः। भित्त्वा प्रहरतां श्रेष्ठो विदेहासूनपातयत्।।

gajavājimanuṣyāṇāṃ śarīrāṇi śitaiḥ śaraiḥ| bhittvā praharatāṃ śreṣṭho videhāsūnapātayat||

Verse 63

शत्रुप्रवीरैरस्त्राणि नानाशस्त्राणि सायकैः। छित्त्वा तानवधीच्छत्रून्पाण्ड्यः शक्र इवासुरान्।।

śatrupravīrairastrāṇi nānāśastrāṇi sāyakaiḥ| chittvā tānavadhīcchatrūnpāṇḍyaḥ śakra ivāsurān||