Adhyaya 24

Verse 1

सञ्जयेनोभयसेनयोरभ्युदयवर्णनम् ।। 1 ।। धृतराष्ट्र उवाच। केषां प्रहृष्टास्तत्राग्रे योधा युध्यन्ति सञ्जय। उदग्रमनसः के वा के वा दीना विचेतसः ।।

sañjayenobhayasenayorabhyudayavarṇanam || 1 || dhṛtarāṣṭra uvāca| keṣāṃ prahṛṣṭāstatrāgre yodhā yudhyanti sañjaya| udagramanasaḥ ke vā ke vā dīnā vicetasaḥ ||

Verse 2

के पूर्वं प्राहरंस्तत्र युद्धे हृदयकम्पने । मामकाः पाण्डवेया वा तन्ममाचक्ष्व सञ्जय ।।

ke pūrvaṃ prāharaṃstatra yuddhe hṛdayakampane | māmakāḥ pāṇḍaveyā vā tanmamācakṣva sañjaya ||

Verse 3

कस्य सेनासमुदये गन्धो माल्यसमुद्भवः । वायुः प्रदक्षिणश्चैव योधानामभिगर्जताम् ।।

kasya senāsamudaye gandho mālyasamudbhavaḥ | vāyuḥ pradakṣiṇaścaiva yodhānāmabhigarjatām ||

Verse 4

सञ्जय उवाच। उभयोः सेनयोस्तत्र योधा जहृषिरे तदा। स्रजः समाः सुगन्धानामुभयत्र समुद्भवः ।।

sañjaya uvāca| ubhayoḥ senayostatra yodhā jahṛṣire tadā| srajaḥ samāḥ sugandhānāmubhayatra samudbhavaḥ ||

Verse 5

संहतानामनीकानां व्यूढानां भरतर्षभ । संसर्गात्समुदीर्णानां विमर्दः सुमहानभूत् ।।

saṃhatānāmanīkānāṃ vyūḍhānāṃ bharatarṣabha | saṃsargātsamudīrṇānāṃ vimardaḥ sumahānabhūt ||

Verse 6

वादित्रशब्दस्तुमुलः शङ्खभेरीविमिश्रितः। शूराणां रणशूराणां गर्जतामितरेतरम् ।।

vāditraśabdastumulaḥ śaṅkhabherīvimiśritaḥ| śūrāṇāṃ raṇaśūrāṇāṃ garjatāmitaretaram ||

Verse 7

उभयोः सेनयो राजन्महान्व्यतिकरोऽभवत्। अन्योन्यं वीक्षमाणानां योधानां भरतर्षभ। कुञ्जराणां च नदतां सैन्यानां च प्रहृष्यताम् ।।

ubhayoḥ senayo rājanmahānvyatikaro'bhavat| anyonyaṃ vīkṣamāṇānāṃ yodhānāṃ bharatarṣabha| kuñjarāṇāṃ ca nadatāṃ sainyānāṃ ca prahṛṣyatām ||