Adhyaya 216

Verse 1

द्रौपदींप्रति कुन्त्या आशीर्वादः।। 1 ।। श्रीकृष्णप्रेषितालंकारादीनां पाण्डवैः स्वीकारः।। 2 ।। वैशंपायन उवाच। पाण्डवैः सह संयोगं गतस्य द्रुपदस्य ह। न बभूव भयं किंचिद्देवेभ्योऽपि कथंचन।।

draupadīṃprati kuntyā āśīrvādaḥ|| 1 || śrīkṛṣṇapreṣitālaṃkārādīnāṃ pāṇḍavaiḥ svīkāraḥ|| 2 || vaiśaṃpāyana uvāca| pāṇḍavaiḥ saha saṃyogaṃ gatasya drupadasya ha| na babhūva bhayaṃ kiṃciddevebhyo'pi kathaṃcana||

Verse 2

कुन्तीमासाद्य ता नार्यो द्रुपदस्य महात्मनः। नाम संकीर्तयन्त्योऽस्या जग्मुः पादौ स्वमूर्धभिः।।

kuntīmāsādya tā nāryo drupadasya mahātmanaḥ| nāma saṃkīrtayantyo'syā jagmuḥ pādau svamūrdhabhiḥ||

Verse 3

कृष्णा च क्षौमसंवीता कृतकौतुकमङ्गला। कृताभिवादना श्वश्र्वास्तस्थौ प्रह्वा कृताञ्जलिः।।

kṛṣṇā ca kṣaumasaṃvītā kṛtakautukamaṅgalā| kṛtābhivādanā śvaśrvāstasthau prahvā kṛtāñjaliḥ||

Verse 4

रूपलक्षणसंपन्नां शीलाचारसमन्विताम्। द्रौपदीमवदत्प्रेम्णा पृथाशीर्वचनं स्नुषाम्।।

rūpalakṣaṇasaṃpannāṃ śīlācārasamanvitām| draupadīmavadatpremṇā pṛthāśīrvacanaṃ snuṣām||

Verse 5

यथेन्द्राणी हरिहये स्वाहा चैव विभावसौ। रोहिणी च यथा सोमे दमयन्ती यथा नले।।

yathendrāṇī harihaye svāhā caiva vibhāvasau| rohiṇī ca yathā some damayantī yathā nale||

Verse 6

यथा वैश्रवणे भद्रा वसिष्ठे चाप्यरुन्धती। यथा नारायणे लक्ष्मीस्तथा त्वं भव भर्तृषु।।

yathā vaiśravaṇe bhadrā vasiṣṭhe cāpyarundhatī| yathā nārāyaṇe lakṣmīstathā tvaṃ bhava bhartṛṣu||

Verse 7

जीवसूर्वीरसूर्भद्रे बहुसौख्यसमन्विता। सुभगा भोगसंपन्ना यज्ञपत्नी पतिव्रता।।

jīvasūrvīrasūrbhadre bahusaukhyasamanvitā| subhagā bhogasaṃpannā yajñapatnī pativratā||

Verse 8

अतिथीनागतान्साधून्वृद्दान्बालांस्तथा गुरून्। पूजयन्त्या यथान्यायं शश्वद्गच्छन्तु ते समाः।।

atithīnāgatānsādhūnvṛddānbālāṃstathā gurūn| pūjayantyā yathānyāyaṃ śaśvadgacchantu te samāḥ||

Verse 9

कुरुजाङ्गलमुख्येषु राष्ट्रेषु नगरेषु च। अनु त्वमभिषिच्यस्व नृपतिं धर्मवत्सला।।

kurujāṅgalamukhyeṣu rāṣṭreṣu nagareṣu ca| anu tvamabhiṣicyasva nṛpatiṃ dharmavatsalā||

Verse 10

पतिभिर्निर्जितामुर्वीं विक्रमेण महाबलैः। कुरु ब्राह्मणसात्सर्वामश्वमेधे महाक्रतौ।।

patibhirnirjitāmurvīṃ vikrameṇa mahābalaiḥ| kuru brāhmaṇasātsarvāmaśvamedhe mahākratau||

Verse 11

पृथिव्यां यानि रत्नानि गुणवन्ति गुणान्विते। तान्याप्नुहि त्वं कल्याणि सुखिनी शरदां शतं।।

pṛthivyāṃ yāni ratnāni guṇavanti guṇānvite| tānyāpnuhi tvaṃ kalyāṇi sukhinī śaradāṃ śataṃ||

Verse 12

यथा च त्वाऽभिनन्दामि वध्वद्य क्षौमसंवृताम्। तथा भूयोऽभिनन्दिष्ये जातपुत्रां गुणान्वितां।।

yathā ca tvā'bhinandāmi vadhvadya kṣaumasaṃvṛtām| tathā bhūyo'bhinandiṣye jātaputrāṃ guṇānvitāṃ||

Verse 13

वैशंपायन उवाच। ततस्तु कृतदारेभ्यः पाण्डुभ्यः प्राहिणोद्धरिः। वैदूर्यमणिचित्राणि हैमान्याभरणानि च।।

vaiśaṃpāyana uvāca| tatastu kṛtadārebhyaḥ pāṇḍubhyaḥ prāhiṇoddhariḥ| vaidūryamaṇicitrāṇi haimānyābharaṇāni ca||

Verse 14

वासांसि च महार्हाणि नानादेश्यानि माधवः। कम्बलाजिनरत्नानि स्पर्शवन्ति शुभानि च।।

vāsāṃsi ca mahārhāṇi nānādeśyāni mādhavaḥ| kambalājinaratnāni sparśavanti śubhāni ca||

Verse 15

शयनासनयानानि विविधानि महान्ति च। वैदूर्यवज्रचित्राणि शतशो भाजनानि च।।

śayanāsanayānāni vividhāni mahānti ca| vaidūryavajracitrāṇi śataśo bhājanāni ca||

Verse 16

रूपयौवनदाक्षिण्यैरुपेताश्च स्वलङ्कृताः। प्रेष्याः संप्रददौ कृष्णो नानादेश्याः स्वलङ्कृताः।।

rūpayauvanadākṣiṇyairupetāśca svalaṅkṛtāḥ| preṣyāḥ saṃpradadau kṛṣṇo nānādeśyāḥ svalaṅkṛtāḥ||

Verse 17

गजान्विनीतान्भद्रांश्च सदश्वांश्च स्वलङ्कृतान्। रथांश्च दान्तान्सौवर्णैः शुभ्रैः पट्टैरलङ्कृतान्।।

gajānvinītānbhadrāṃśca sadaśvāṃśca svalaṅkṛtān| rathāṃśca dāntānsauvarṇaiḥ śubhraiḥ paṭṭairalaṅkṛtān||

Verse 18

कोटिशश्च सुवर्णं च तेषामकृतकं तथा। वीथीकृतममेयात्मा प्राहिणोन्मधुसूदनः।।

koṭiśaśca suvarṇaṃ ca teṣāmakṛtakaṃ tathā| vīthīkṛtamameyātmā prāhiṇonmadhusūdanaḥ||

Verse 19

तत्सर्वं प्रतिजग्राह धर्मराजो युधिष्ठिरः। मुदा परमया युक्तो गोविन्दप्रियकाम्यया।।

tatsarvaṃ pratijagrāha dharmarājo yudhiṣṭhiraḥ| mudā paramayā yukto govindapriyakāmyayā||