Sukta 8
Mandala 9 · 9 rks
9 rks · free forever
Listen at your pace. New audio may take a moment to prepare. Narration settings
Rk 1
ए॒ते सोमा॑ अ॒भि प्रि॒यमिन्द्र॑स्य॒ काम॑मक्षरन् वर्ध॑न्तो अस्य वी॒र्य॑म्
Rk 2
पु॒ना॒नास॑श्चमू॒षदो॒ गच्छ॑न्तो वा॒युम॒श्विना॑ ते नो॑ धान्तु सु॒वीर्य॑म्
Rk 3
इन्द्र॑स्य सोम॒ राध॑से पुना॒नो हार्दि॑ चोदय ऋ॒तस्य॒ योनि॑मा॒सद॑म्
Rk 4
मृ॒जन्ति॑ त्वा॒ दश॒ क्षिपो॑ हि॒न्वन्ति॑ स॒प्त धी॒तयः॑ अनु॒ विप्रा॑ अमादिषुः
Rk 5
दे॒वेभ्य॑स्त्वा॒ मदा॑य॒ कं सृ॑जा॒नमति॑ मे॒ष्यः॑ सं गोभि॑र्वासयामसि
Rk 6
पु॒ना॒नः क॒लशे॒ष्वा वस्त्रा॑ण्यरु॒षो हरिः॑ परि॒ गव्या॑न्यव्यत
Rk 7
म॒घोन॒ आ प॑वस्व नो ज॒हि विश्वा॒ अप॒ द्विषः॑ इन्दो॒ सखा॑य॒मा वि॑श
Rk 8
वृ॒ष्टिं दि॒वः परि॑ स्रव द्यु॒म्नं पृ॑थि॒व्या अधि॑ सहो॑ नः सोम पृ॒त्सु धाः॑
Rk 9
नृ॒चक्ष॑सं त्वा व॒यमिन्द्र॑पीतं स्व॒र्विद॑म् भ॒क्षी॒महि॑ प्र॒जामिष॑म्