Sukta 7

Rk 1

असृ॑ग्र॒मिन्द॑वः प॒था धर्म॑न्नृ॒तस्य॑ सु॒श्रियः॑ वि॒दा॒ना अ॑स्य॒ योज॑नम्

Rk 2

प्र धारा॒ मध्वो॑ अग्रि॒यो म॒हीर॒पो वि गा॑हते ह॒विर्ह॒विष्षु॒ वन्द्यः॑

Rk 3

प्र यु॒जो वा॒चो अ॑ग्रि॒यो वृषाव॑ चक्रद॒द्वने॑ सद्मा॒भि स॒त्यो अ॑ध्व॒रः

Rk 4

परि॒ यत्काव्या॑ क॒विर्नृ॒म्णा वसा॑नो॒ अर्ष॑ति स्व॑र्वा॒जी सि॑षासति

Rk 5

पव॑मानो अ॒भि स्पृधो॒ विशो॒ राजे॑व सीदति यदी॑मृ॒ण्वन्ति॑ वे॒धसः॑

Rk 6

अव्यो॒ वारे॒ परि॑ प्रि॒यो हरि॒र्वने॑षु सीदति रे॒भो व॑नुष्यते म॒ती

Rk 7

स वा॒युमिन्द्र॑म॒श्विना॑ सा॒कं मदे॑न गच्छति रणा॒ यो अ॑स्य॒ धर्म॑भिः

Rk 8

आ मि॒त्रावरु॑णा॒ भगं॒ मध्वः॑ पवन्त ऊ॒र्मयः॑ वि॒दा॒ना अ॑स्य॒ शक्म॑भिः

Rk 9

अ॒स्मभ्यं॑ रोदसी र॒यिं मध्वो॒ वाज॑स्य सा॒तये॑ श्रवो॒ वसू॑नि॒ सं जि॑तम्