Sukta 65

Rk 1

हि॒न्वन्ति॒ सूर॒मुस्र॑यः॒ स्वसा॑रो जा॒मय॒स्पति॑म् म॒हामिन्दुं॑ मही॒युवः॑

Rk 2

पव॑मान रु॒चारु॑चा दे॒वो दे॒वेभ्य॒स्परि॑ विश्वा॒ वसू॒न्या वि॑श

Rk 3

आ प॑वमान सुष्टु॒तिं वृ॒ष्टिं दे॒वेभ्यो॒ दुवः॑ इ॒षे प॑वस्व सं॒यत॑म्

Rk 4

वृषा॒ ह्यसि॑ भा॒नुना॑ द्यु॒मन्तं॑ त्वा हवामहे पव॑मान स्वा॒ध्यः॑

Rk 5

आ प॑वस्व सु॒वीर्यं॒ मन्द॑मानः स्वायुध इ॒हो ष्वि॑न्द॒वा ग॑हि

Rk 6

यद॒द्भिः प॑रिषि॒च्यसे॑ मृ॒ज्यमा॑नो॒ गभ॑स्त्योः द्रुणा॑ स॒धस्थ॑मश्नुषे

Rk 7

प्र सोमा॑य व्यश्व॒वत्पव॑मानाय गायत म॒हे स॒हस्र॑चक्षसे

Rk 8

यस्य॒ वर्णं॑ मधु॒श्चुतं॒ हरिं॑ हि॒न्वन्त्यद्रि॑भिः इन्दु॒मिन्द्रा॑य पी॒तये॑

Rk 9

तस्य॑ ते वा॒जिनो॑ व॒यं विश्वा॒ धना॑नि जि॒ग्युषः॑ स॒खि॒त्वमा वृ॑णीमहे

Rk 10

वृषा॑ पवस्व॒ धार॑या म॒रुत्व॑ते च मत्स॒रः विश्वा॒ दधा॑न॒ ओज॑सा

Rk 11

तं त्वा॑ ध॒र्तार॑मो॒ण्यो॒३॒॑ः पव॑मान स्व॒र्दृश॑म् हि॒न्वे वाजे॑षु वा॒जिन॑म्

Rk 12

अ॒या चि॒त्तो वि॒पानया॒ हरिः॑ पवस्व॒ धार॑या युजं॒ वाजे॑षु चोदय

Rk 13

आ न॑ इन्दो म॒हीमिषं॒ पव॑स्व वि॒श्वद॑र्शतः अ॒स्मभ्यं॑ सोम गातु॒वित्

Rk 14

आ क॒लशा॑ अनूष॒तेन्दो॒ धारा॑भि॒रोज॑सा एन्द्र॑स्य पी॒तये॑ विश

Rk 15

यस्य॑ ते॒ मद्यं॒ रसं॑ ती॒व्रं दु॒हन्त्यद्रि॑भिः स प॑वस्वाभिमाति॒हा

Rk 16

राजा॑ मे॒धाभि॑रीयते॒ पव॑मानो म॒नावधि॑ अ॒न्तरि॑क्षेण॒ यात॑वे

Rk 17

आ न॑ इन्दो शत॒ग्विनं॒ गवां॒ पोषं॒ स्वश्व्य॑म् वहा॒ भग॑त्तिमू॒तये॑

Rk 18

आ नः॑ सोम॒ सहो॒ जुवो॑ रू॒पं न वर्च॑से भर सु॒ष्वा॒णो दे॒ववी॑तये

Rk 19

अर्षा॑ सोम द्यु॒मत्त॑मो॒ऽभि द्रोणा॑नि॒ रोरु॑वत् सीद॑ञ्छ्ये॒नो न योनि॒मा

Rk 20

अ॒प्सा इन्द्रा॑य वा॒यवे॒ वरु॑णाय म॒रुद्भ्यः॑ सोमो॑ अर्षति॒ विष्ण॑वे

Rk 21

इषं॑ तो॒काय॑ नो॒ दध॑द॒स्मभ्यं॑ सोम वि॒श्वतः॑ आ प॑वस्व सह॒स्रिण॑म्

Rk 22

ये सोमा॑सः परा॒वति॒ ये अ॑र्वा॒वति॑ सुन्वि॒रे ये वा॒दः श॑र्य॒णाव॑ति

Rk 23

य आ॑र्जी॒केषु॒ कृत्व॑सु॒ ये मध्ये॑ प॒स्त्या॑नाम् ये वा॒ जने॑षु प॒ञ्चसु॑

Rk 24

ते नो॑ वृ॒ष्टिं दि॒वस्परि॒ पव॑न्ता॒मा सु॒वीर्य॑म् सु॒वा॒ना दे॒वास॒ इन्द॑वः

Rk 25

पव॑ते हर्य॒तो हरि॑र्गृणा॒नो ज॒मद॑ग्निना हि॒न्वा॒नो गोरधि॑ त्व॒चि

Rk 26

प्र शु॒क्रासो॑ वयो॒जुवो॑ हिन्वा॒नासो॒ न सप्त॑यः श्री॒णा॒ना अ॒प्सु मृ॑ञ्जत

Rk 27

तं त्वा॑ सु॒तेष्वा॒भुवो॑ हिन्वि॒रे दे॒वता॑तये स प॑वस्वा॒नया॑ रु॒चा

Rk 28

आ ते॒ दक्षं॑ मयो॒भुवं॒ वह्नि॑म॒द्या वृ॑णीमहे पान्त॒मा पु॑रु॒स्पृह॑म्

Rk 29

आ म॒न्द्रमा वरे॑ण्य॒मा विप्र॒मा म॑नी॒षिण॑म् पान्त॒मा पु॑रु॒स्पृह॑म्

Rk 30

आ र॒यिमा सु॑चे॒तुन॒मा सु॑क्रतो त॒नूष्वा पान्त॒मा पु॑रु॒स्पृह॑म्