Sukta 63

Rk 1

आ प॑वस्व सह॒स्रिणं॑ र॒यिं सो॑म सु॒वीर्य॑म् अ॒स्मे श्रवां॑सि धारय

Rk 2

इष॒मूर्जं॑ च पिन्वस॒ इन्द्रा॑य मत्स॒रिन्त॑मः च॒मूष्वा नि षी॑दसि

Rk 3

सु॒त इन्द्रा॑य॒ विष्ण॑वे॒ सोमः॑ क॒लशे॑ अक्षरत् मधु॑माँ अस्तु वा॒यवे॑

Rk 4

ए॒ते अ॑सृग्रमा॒शवोऽति॒ ह्वरां॑सि ब॒भ्रवः॑ सोमा॑ ऋ॒तस्य॒ धार॑या

Rk 5

इन्द्रं॒ वर्ध॑न्तो अ॒प्तुरः॑ कृ॒ण्वन्तो॒ विश्व॒मार्य॑म् अ॒प॒घ्नन्तो॒ अरा॑व्णः

Rk 6

सु॒ता अनु॒ स्वमा रजो॒ऽभ्य॑र्षन्ति ब॒भ्रवः॑ इन्द्रं॒ गच्छ॑न्त॒ इन्द॑वः

Rk 7

अ॒या प॑वस्व॒ धार॑या॒ यया॒ सूर्य॒मरो॑चयः हि॒न्वा॒नो मानु॑षीर॒पः

Rk 8

अयु॑क्त॒ सूर॒ एत॑शं॒ पव॑मानो म॒नावधि॑ अ॒न्तरि॑क्षेण॒ यात॑वे

Rk 9

उ॒त त्या ह॒रितो॒ दश॒ सूरो॑ अयुक्त॒ यात॑वे इन्दु॒रिन्द्र॒ इति॑ ब्रु॒वन्

Rk 10

परी॒तो वा॒यवे॑ सु॒तं गिर॒ इन्द्रा॑य मत्स॒रम् अव्यो॒ वारे॑षु सिञ्चत

Rk 11

पव॑मान वि॒दा र॒यिम॒स्मभ्यं॑ सोम दु॒ष्टर॑म् यो दू॒णाशो॑ वनुष्य॒ता

Rk 12

अ॒भ्य॑र्ष सह॒स्रिणं॑ र॒यिं गोम॑न्तम॒श्विन॑म् अ॒भि वाज॑मु॒त श्रवः॑

Rk 13

सोमो॑ दे॒वो न सूर्योऽद्रि॑भिः पवते सु॒तः दधा॑नः क॒लशे॒ रस॑म्

Rk 14

ए॒ते धामा॒न्यार्या॑ शु॒क्रा ऋ॒तस्य॒ धार॑या वाजं॒ गोम॑न्तमक्षरन्

Rk 15

सु॒ता इन्द्रा॑य व॒ज्रिणे॒ सोमा॑सो॒ दध्या॑शिरः प॒वित्र॒मत्य॑क्षरन्

Rk 16

प्र सो॑म॒ मधु॑मत्तमो रा॒ये अ॑र्ष प॒वित्र॒ आ मदो॒ यो दे॑व॒वीत॑मः

Rk 17

तमी॑ मृजन्त्या॒यवो॒ हरिं॑ न॒दीषु॑ वा॒जिन॑म् इन्दु॒मिन्द्रा॑य मत्स॒रम्

Rk 18

आ प॑वस्व॒ हिर॑ण्यव॒दश्वा॑वत्सोम वी॒रव॑त् वाजं॒ गोम॑न्त॒मा भ॑र

Rk 19

परि॒ वाजे॒ न वा॑ज॒युमव्यो॒ वारे॑षु सिञ्चत इन्द्रा॑य॒ मधु॑मत्तमम्

Rk 20

क॒विं मृ॑जन्ति॒ मर्ज्यं॑ धी॒भिर्विप्रा॑ अव॒स्यवः॑ वृषा॒ कनि॑क्रदर्षति

Rk 21

वृष॑णं धी॒भिर॒प्तुरं॒ सोम॑मृ॒तस्य॒ धार॑या म॒ती विप्राः॒ सम॑स्वरन्

Rk 22

पव॑स्व देवायु॒षगिन्द्रं॑ गच्छतु ते॒ मदः॑ वा॒युमा रो॑ह॒ धर्म॑णा

Rk 23

पव॑मान॒ नि तो॑शसे र॒यिं सो॑म श्र॒वाय्य॑म् प्रि॒यः स॑मु॒द्रमा वि॑श

Rk 24

अ॒प॒घ्नन्प॑वसे॒ मृधः॑ क्रतु॒वित्सो॑म मत्स॒रः नु॒दस्वादे॑वयुं॒ जन॑म्

Rk 25

पव॑माना असृक्षत॒ सोमाः॑ शु॒क्रास॒ इन्द॑वः अ॒भि विश्वा॑नि॒ काव्या॑

Rk 26

पव॑मानास आ॒शवः॑ शु॒भ्रा अ॑सृग्र॒मिन्द॑वः घ्नन्तो॒ विश्वा॒ अप॒ द्विषः॑

Rk 27

पव॑माना दि॒वस्पर्य॒न्तरि॑क्षादसृक्षत पृ॒थि॒व्या अधि॒ सान॑वि

Rk 28

पु॒ना॒नः सो॑म॒ धार॒येन्दो॒ विश्वा॒ अप॒ स्रिधः॑ ज॒हि रक्षां॑सि सुक्रतो

Rk 29

अ॒प॒घ्नन्त्सो॑म र॒क्षसो॒ऽभ्य॑र्ष॒ कनि॑क्रदत् द्यु॒मन्तं॒ शुष्म॑मुत्त॒मम्

Rk 30

अ॒स्मे वसू॑नि धारय॒ सोम॑ दि॒व्यानि॒ पार्थि॑वा इन्दो॒ विश्वा॑नि॒ वार्या॑