Sukta 61
Mandala 9 · 30 rks
30 rks · free forever
Listen at your pace. New audio may take a moment to prepare. Narration settings
Rk 1
अ॒या वी॒ती परि॑ स्रव॒ यस्त॑ इन्दो॒ मदे॒ष्वा अ॒वाह॑न्नव॒तीर्नव॑
Rk 2
पुरः॑ स॒द्य इ॒त्थाधि॑ये॒ दिवो॑दासाय॒ शम्ब॑रम् अध॒ त्यं तु॒र्वशं॒ यदु॑म्
Rk 3
परि॑ णो॒ अश्व॑मश्व॒विद्गोम॑दिन्दो॒ हिर॑ण्यवत् क्षरा॑ सह॒स्रिणी॒रिषः॑
Rk 4
पव॑मानस्य ते व॒यं प॒वित्र॑मभ्युन्द॒तः स॒खि॒त्वमा वृ॑णीमहे
Rk 5
ये ते॑ प॒वित्र॑मू॒र्मयो॑ऽभि॒क्षर॑न्ति॒ धार॑या तेभि॑र्नः सोम मृळय
Rk 6
स नः॑ पुना॒न आ भ॑र र॒यिं वी॒रव॑ती॒मिष॑म् ईशा॑नः सोम वि॒श्वतः॑
Rk 7
ए॒तमु॒ त्यं दश॒ क्षिपो॑ मृ॒जन्ति॒ सिन्धु॑मातरम् समा॑दि॒त्येभि॑रख्यत
Rk 8
समिन्द्रे॑णो॒त वा॒युना॑ सु॒त ए॑ति प॒वित्र॒ आ सं सूर्य॑स्य र॒श्मिभिः॑
Rk 9
स नो॒ भगा॑य वा॒यवे॑ पू॒ष्णे प॑वस्व॒ मधु॑मान् चारु॑र्मि॒त्रे वरु॑णे च
Rk 10
उ॒च्चा ते॑ जा॒तमन्ध॑सो दि॒वि षद्भूम्या द॑दे उ॒ग्रं शर्म॒ महि॒ श्रवः॑
Rk 11
ए॒ना विश्वा॑न्य॒र्य आ द्यु॒म्नानि॒ मानु॑षाणाम् सिषा॑सन्तो वनामहे
Rk 12
स न॒ इन्द्रा॑य॒ यज्य॑वे॒ वरु॑णाय म॒रुद्भ्यः॑ व॒रि॒वो॒वित्परि॑ स्रव
Rk 13
उपो॒ षु जा॒तम॒प्तुरं॒ गोभि॑र्भ॒ङ्गं परि॑ष्कृतम् इन्दुं॑ दे॒वा अ॑यासिषुः
Rk 14
तमिद्व॑र्धन्तु नो॒ गिरो॑ व॒त्सं सं॒शिश्व॑रीरिव य इन्द्र॑स्य हृदं॒सनिः॑
Rk 15
अर्षा॑ णः सोम॒ शं गवे॑ धु॒क्षस्व॑ पि॒प्युषी॒मिष॑म् वर्धा॑ समु॒द्रमु॒क्थ्य॑म्
Rk 16
पव॑मानो अजीजनद्दि॒वश्चि॒त्रं न त॑न्य॒तुम् ज्योति॑र्वैश्वान॒रं बृ॒हत्
Rk 17
पव॑मानस्य ते॒ रसो॒ मदो॑ राजन्नदुच्छु॒नः वि वार॒मव्य॑मर्षति
Rk 18
पव॑मान॒ रस॒स्तव॒ दक्षो॒ वि रा॑जति द्यु॒मान् ज्योति॒र्विश्वं॒ स्व॑र्दृ॒शे
Rk 19
यस्ते॒ मदो॒ वरे॑ण्य॒स्तेना॑ पव॒स्वान्ध॑सा दे॒वा॒वीर॑घशंस॒हा
Rk 20
जघ्नि॑र्वृ॒त्रम॑मि॒त्रियं॒ सस्नि॒र्वाजं॑ दि॒वेदि॑वे गो॒षा उ॑ अश्व॒सा अ॑सि
Rk 21
सम्मि॑श्लो अरु॒षो भ॑व सूप॒स्थाभि॒र्न धे॒नुभिः॑ सीद॑ञ्छ्ये॒नो न योनि॒मा
Rk 22
स प॑वस्व॒ य आवि॒थेन्द्रं॑ वृ॒त्राय॒ हन्त॑वे व॒व्रि॒वांसं॑ म॒हीर॒पः
Rk 23
सु॒वीरा॑सो व॒यं धना॒ जये॑म सोम मीढ्वः पु॒ना॒नो व॑र्ध नो॒ गिरः॑
Rk 24
त्वोता॑स॒स्तवाव॑सा॒ स्याम॑ व॒न्वन्त॑ आ॒मुरः॑ सोम॑ व्र॒तेषु॑ जागृहि
Rk 25
अ॒प॒घ्नन्प॑वते॒ मृधोऽप॒ सोमो॒ अरा॑व्णः गच्छ॒न्निन्द्र॑स्य निष्कृ॒तम्
Rk 26
म॒हो नो॑ रा॒य आ भ॑र॒ पव॑मान ज॒ही मृधः॑ रास्वे॑न्दो वी॒रव॒द्यशः॑
Rk 27
न त्वा॑ श॒तं च॒न ह्रुतो॒ राधो॒ दित्स॑न्त॒मा मि॑नन् यत्पु॑ना॒नो म॑ख॒स्यसे॑
Rk 28
पव॑स्वेन्दो॒ वृषा॑ सु॒तः कृ॒धी नो॑ य॒शसो॒ जने॑ विश्वा॒ अप॒ द्विषो॑ जहि
Rk 29
अस्य॑ ते स॒ख्ये व॒यं तवे॑न्दो द्यु॒म्न उ॑त्त॒मे सा॒स॒ह्याम॑ पृतन्य॒तः
Rk 30
या ते॑ भी॒मान्यायु॑धा ति॒ग्मानि॒ सन्ति॒ धूर्व॑णे रक्षा॑ समस्य नो नि॒दः