Sukta 10
Mandala 9 · 9 rks
9 rks · free forever
Listen to this section
Uses your saved HI voice · Narration settings
Rk 1
प्र स्वा॒नासो॒ रथा॑ इ॒वार्व॑न्तो॒ न श्र॑व॒स्यवः॑ सोमा॑सो रा॒ये अ॑क्रमुः
Rk 2
हि॒न्वा॒नासो॒ रथा॑ इव दधन्वि॒रे गभ॑स्त्योः भरा॑सः का॒रिणा॑मिव
Rk 3
राजा॑नो॒ न प्रश॑स्तिभिः॒ सोमा॑सो॒ गोभि॑रञ्जते य॒ज्ञो न स॒प्त धा॒तृभिः॑
Rk 4
परि॑ सुवा॒नास॒ इन्द॑वो॒ मदा॑य ब॒र्हणा॑ गि॒रा सु॒ता अ॑र्षन्ति॒ धार॑या
Rk 5
आ॒पा॒नासो॑ वि॒वस्व॑तो॒ जन॑न्त उ॒षसो॒ भग॑म् सूरा॒ अण्वं॒ वि त॑न्वते
Rk 6
अप॒ द्वारा॑ मती॒नां प्र॒त्ना ऋ॑ण्वन्ति का॒रवः॑ वृष्णो॒ हर॑स आ॒यवः॑
Rk 7
स॒मी॒ची॒नास॑ आसते॒ होता॑रः स॒प्तजा॑मयः प॒दमेक॑स्य॒ पिप्र॑तः
Rk 8
नाभा॒ नाभिं॑ न॒ आ द॑दे॒ चक्षु॑श्चि॒त्सूर्ये॒ सचा॑ क॒वेरप॑त्य॒मा दु॑हे
Rk 9
अ॒भि प्रि॒या दि॒वस्प॒दम॑ध्व॒र्युभि॒र्गुहा॑ हि॒तम् सूरः॑ पश्यति॒ चक्ष॑सा