Sukta 75
Mandala 8 · 16 rks
16 rks · free forever
Listen at your pace. New audio may take a moment to prepare. Narration settings
Rk 1
यु॒क्ष्वा हि दे॑व॒हूत॑माँ॒ अश्वाँ॑ अग्ने र॒थीरि॑व नि होता॑ पू॒र्व्यः स॑दः
Rk 2
उ॒त नो॑ देव दे॒वाँ अच्छा॑ वोचो वि॒दुष्ट॑रः श्रद्विश्वा॒ वार्या॑ कृधि
Rk 3
त्वं ह॒ यद्य॑विष्ठ्य॒ सह॑सः सूनवाहुत ऋ॒तावा॑ य॒ज्ञियो॒ भुवः॑
Rk 4
अ॒यम॒ग्निः स॑ह॒स्रिणो॒ वाज॑स्य श॒तिन॒स्पतिः॑ मू॒र्धा क॒वी र॑यी॒णाम्
Rk 5
तं ने॒मिमृ॒भवो॑ य॒था न॑मस्व॒ सहू॑तिभिः नेदी॑यो य॒ज्ञम॑ङ्गिरः
Rk 6
तस्मै॑ नू॒नम॒भिद्य॑वे वा॒चा वि॑रूप॒ नित्य॑या वृष्णे॑ चोदस्व सुष्टु॒तिम्
Rk 7
कमु॑ ष्विदस्य॒ सेन॑या॒ग्नेरपा॑कचक्षसः प॒णिं गोषु॑ स्तरामहे
Rk 8
मा नो॑ दे॒वानां॒ विशः॑ प्रस्ना॒तीरि॑वो॒स्राः कृ॒शं न हा॑सु॒रघ्न्याः॑
Rk 9
मा नः॑ समस्य दू॒ढ्य१॒॑ः परि॑द्वेषसो अंह॒तिः ऊ॒र्मिर्न नाव॒मा व॑धीत्
Rk 10
नम॑स्ते अग्न॒ ओज॑से गृ॒णन्ति॑ देव कृ॒ष्टयः॑ अमै॑र॒मित्र॑मर्दय
Rk 11
कु॒वित्सु नो॒ गवि॑ष्ट॒येऽग्ने॑ सं॒वेषि॑षो र॒यिम् उरु॑कृदु॒रु ण॑स्कृधि
Rk 12
मा नो॑ अ॒स्मिन्म॑हाध॒ने परा॑ वर्ग्भार॒भृद्य॑था सं॒वर्गं॒ सं र॒यिं ज॑य
Rk 13
अ॒न्यम॒स्मद्भि॒या इ॒यमग्ने॒ सिष॑क्तु दु॒च्छुना॑ वर्धा॑ नो॒ अम॑व॒च्छवः॑
Rk 14
यस्याजु॑षन्नम॒स्विनः॒ शमी॒मदु॑र्मखस्य वा तं घेद॒ग्निर्वृ॒धाव॑ति
Rk 15
पर॑स्या॒ अधि॑ सं॒वतोऽव॑राँ अ॒भ्या त॑र यत्रा॒हमस्मि॒ ताँ अ॑व
Rk 16
वि॒द्मा हि ते॑ पु॒रा व॒यमग्ने॑ पि॒तुर्यथाव॑सः अधा॑ ते सु॒म्नमी॑महे