Sukta 73

Rk 1

उदी॑राथामृताय॒ते यु॒ञ्जाथा॑मश्विना॒ रथ॑म् अन्ति॒ षद्भू॑तु वा॒मवः॑

Rk 2

नि॒मिष॑श्चि॒ज्जवी॑यसा॒ रथे॒ना या॑तमश्विना अन्ति॒ षद्भू॑तु वा॒मवः॑

Rk 3

उप॑ स्तृणीत॒मत्र॑ये हि॒मेन॑ घ॒र्मम॑श्विना अन्ति॒ षद्भू॑तु वा॒मवः॑

Rk 4

कुह॑ स्थः॒ कुह॑ जग्मथुः॒ कुह॑ श्ये॒नेव॑ पेतथुः अन्ति॒ षद्भू॑तु वा॒मवः॑

Rk 5

यद॒द्य कर्हि॒ कर्हि॑ चिच्छुश्रू॒यात॑मि॒मं हव॑म् अन्ति॒ षद्भू॑तु वा॒मवः॑

Rk 6

अ॒श्विना॑ याम॒हूत॑मा॒ नेदि॑ष्ठं या॒म्याप्य॑म् अन्ति॒ षद्भू॑तु वा॒मवः॑

Rk 7

अव॑न्त॒मत्र॑ये गृ॒हं कृ॑णु॒तं यु॒वम॑श्विना अन्ति॒ षद्भू॑तु वा॒मवः॑

Rk 8

वरे॑थे अ॒ग्निमा॒तपो॒ वद॑ते व॒ल्ग्वत्र॑ये अन्ति॒ षद्भू॑तु वा॒मवः॑

Rk 9

प्र स॒प्तव॑ध्रिरा॒शसा॒ धारा॑म॒ग्नेर॑शायत अन्ति॒ षद्भू॑तु वा॒मवः॑

Rk 10

इ॒हा ग॑तं वृषण्वसू शृणु॒तं म॑ इ॒मं हव॑म् अन्ति॒ षद्भू॑तु वा॒मवः॑

Rk 11

किमि॒दं वां॑ पुराण॒वज्जर॑तोरिव शस्यते अन्ति॒ षद्भू॑तु वा॒मवः॑

Rk 12

स॒मा॒नं वां॑ सजा॒त्यं॑ समा॒नो बन्धु॑रश्विना अन्ति॒ षद्भू॑तु वा॒मवः॑

Rk 13

यो वां॒ रजां॑स्यश्विना॒ रथो॑ वि॒याति॒ रोद॑सी अन्ति॒ षद्भू॑तु वा॒मवः॑

Rk 14

आ नो॒ गव्ये॑भि॒रश्व्यैः॑ स॒हस्रै॒रुप॑ गच्छतम् अन्ति॒ षद्भू॑तु वा॒मवः॑

Rk 15

मा नो॒ गव्ये॑भि॒रश्व्यैः॑ स॒हस्रे॑भि॒रति॑ ख्यतम् अन्ति॒ षद्भू॑तु वा॒मवः॑

Rk 16

अ॒रु॒णप्सु॑रु॒षा अ॑भू॒दक॒र्ज्योति॑र्ऋ॒ताव॑री अन्ति॒ षद्भू॑तु वा॒मवः॑

Rk 17

अ॒श्विना॒ सु वि॒चाक॑शद्वृ॒क्षं प॑रशु॒माँ इ॑व अन्ति॒ षद्भू॑तु वा॒मवः॑

Rk 18

पुरं॒ न धृ॑ष्ण॒वा रु॑ज कृ॒ष्णया॑ बाधि॒तो वि॒शा अन्ति॒ षद्भू॑तु वा॒मवः॑