Sukta 24

Rk 1

सखा॑य॒ आ शि॑षामहि॒ ब्रह्मेन्द्रा॑य व॒ज्रिणे॑ स्तु॒ष ऊ॒ षु वो॒ नृत॑माय धृ॒ष्णवे॑

Rk 2

शव॑सा॒ ह्यसि॑ श्रु॒तो वृ॑त्र॒हत्ये॑न वृत्र॒हा म॒घैर्म॒घोनो॒ अति॑ शूर दाशसि

Rk 3

स नः॒ स्तवा॑न॒ आ भ॑र र॒यिं चि॒त्रश्र॑वस्तमम् नि॒रे॒के चि॒द्यो ह॑रिवो॒ वसु॑र्द॒दिः

Rk 4

आ नि॑रे॒कमु॒त प्रि॒यमिन्द्र॒ दर्षि॒ जना॑नाम् धृ॒ष॒ता धृ॑ष्णो॒ स्तव॑मान॒ आ भ॑र

Rk 5

न ते॑ स॒व्यं न दक्षि॑णं॒ हस्तं॑ वरन्त आ॒मुरः॑ न प॑रि॒बाधो॑ हरिवो॒ गवि॑ष्टिषु

Rk 6

आ त्वा॒ गोभि॑रिव व्र॒जं गी॒र्भिर्ऋ॑णोम्यद्रिवः आ स्मा॒ कामं॑ जरि॒तुरा मनः॑ पृण

Rk 7

विश्वा॑नि वि॒श्वम॑नसो धि॒या नो॑ वृत्रहन्तम उग्र॑ प्रणेत॒रधि॒ षू व॑सो गहि

Rk 8

व॒यं ते॑ अ॒स्य वृ॑त्रहन्वि॒द्याम॑ शूर॒ नव्य॑सः वसोः॑ स्पा॒र्हस्य॑ पुरुहूत॒ राध॑सः

Rk 9

इन्द्र॒ यथा॒ ह्यस्ति॒ तेऽप॑रीतं नृतो॒ शवः॑ अमृ॑क्ता रा॒तिः पु॑रुहूत दा॒शुषे॑

Rk 10

आ वृ॑षस्व महामह म॒हे नृ॑तम॒ राध॑से दृ॒ळ्हश्चि॑द्दृह्य मघवन्म॒घत्त॑ये

Rk 11

नू अ॒न्यत्रा॑ चिदद्रिव॒स्त्वन्नो॑ जग्मुरा॒शसः॑ मघ॑वञ्छ॒ग्धि तव॒ तन्न॑ ऊ॒तिभिः॑

Rk 12

न॒ह्य१॒॑ङ्ग नृ॑तो॒ त्वद॒न्यं वि॒न्दामि॒ राध॑से रा॒ये द्यु॒म्नाय॒ शव॑से च गिर्वणः

Rk 13

एन्दु॒मिन्द्रा॑य सिञ्चत॒ पिबा॑ति सो॒म्यं मधु॑ प्र राध॑सा चोदयाते महित्व॒ना

Rk 14

उपो॒ हरी॑णां॒ पतिं॒ दक्षं॑ पृ॒ञ्चन्त॑मब्रवम् नू॒नं श्रु॑धि स्तुव॒तो अ॒श्व्यस्य॑

Rk 15

न॒ह्य१॒॑ङ्ग पु॒रा च॒न ज॒ज्ञे वी॒रत॑र॒स्त्वत् नकी॑ रा॒या नैवथा॒ न भ॒न्दना॑

Rk 16

एदु॒ मध्वो॑ म॒दिन्त॑रं सि॒ञ्च वा॑ध्वर्यो॒ अन्ध॑सः ए॒वा हि वी॒रः स्तव॑ते स॒दावृ॑धः

Rk 17

इन्द्र॑ स्थातर्हरीणां॒ नकि॑ष्टे पू॒र्व्यस्तु॑तिम् उदा॑नंश॒ शव॑सा॒ न भ॒न्दना॑

Rk 18

तं वो॒ वाजा॑नां॒ पति॒महू॑महि श्रव॒स्यवः॑ अप्रा॑युभिर्य॒ज्ञेभि॑र्वावृ॒धेन्य॑म्

Rk 19

एतो॒ न्विन्द्रं॒ स्तवा॑म॒ सखा॑यः॒ स्तोम्यं॒ नर॑म् कृ॒ष्टीर्यो विश्वा॑ अ॒भ्यस्त्येक॒ इत्

Rk 20

अगो॑रुधाय ग॒विषे॑ द्यु॒क्षाय॒ दस्म्यं॒ वचः॑ घृ॒तात्स्वादी॑यो॒ मधु॑नश्च वोचत

Rk 21

यस्यामि॑तानि वी॒र्या॒३॒॑ न राधः॒ पर्ये॑तवे ज्योति॒र्न विश्व॑म॒भ्यस्ति॒ दक्षि॑णा

Rk 22

स्तु॒हीन्द्रं॑ व्यश्व॒वदनू॑र्मिं वा॒जिनं॒ यम॑म् अ॒र्यो गयं॒ मंह॑मानं॒ वि दा॒शुषे॑

Rk 23

ए॒वा नू॒नमुप॑ स्तुहि॒ वैय॑श्व दश॒मं नव॑म् सुवि॑द्वांसं च॒र्कृत्यं॑ च॒रणी॑नाम्

Rk 24

वेत्था॒ हि निर्ऋ॑तीनां॒ वज्र॑हस्त परि॒वृज॑म् अह॑रहः शु॒न्ध्युः प॑रि॒पदा॑मिव

Rk 25

तदि॒न्द्राव॒ आ भ॑र॒ येना॑ दंसिष्ठ॒ कृत्व॑ने द्वि॒ता कुत्सा॑य शिश्नथो॒ नि चो॑दय

Rk 26

तमु॑ त्वा नू॒नमी॑महे॒ नव्यं॑ दंसिष्ठ॒ सन्य॑से स त्वं नो॒ विश्वा॑ अ॒भिमा॑तीः स॒क्षणिः॑

Rk 27

य ऋक्षा॒दंह॑सो मु॒चद्यो वार्या॑त्स॒प्त सिन्धु॑षु वध॑र्दा॒सस्य॑ तुविनृम्ण नीनमः

Rk 28

यथा॑ वरो सु॒षाम्णे॑ स॒निभ्य॒ आव॑हो र॒यिम् व्य॑श्वेभ्यः सुभगे वाजिनीवति

Rk 29

आ ना॒र्यस्य॒ दक्षि॑णा॒ व्य॑श्वाँ एतु सो॒मिनः॑ स्थू॒रं च॒ राधः॑ श॒तव॑त्स॒हस्र॑वत्

Rk 30

यत्त्वा॑ पृ॒च्छादी॑जा॒नः कु॑ह॒या कु॑हयाकृते ए॒षो अप॑श्रितो व॒लो गो॑म॒तीमव॑ तिष्ठति