Sukta 54
Mandala 6 · 10 rks
10 rks · free forever
Listen at your pace. New audio may take a moment to prepare. Narration settings
Rk 1
सं पू॑षन्वि॒दुषा॑ नय॒ यो अञ्ज॑सानु॒शास॑ति य ए॒वेदमिति॒ ब्रव॑त्
Rk 2
समु॑ पू॒ष्णा ग॑मेमहि॒ यो गृ॒हाँ अ॑भि॒शास॑ति इ॒म ए॒वेति॑ च॒ ब्रव॑त्
Rk 3
पू॒ष्णश्च॒क्रं न रि॑ष्यति॒ न कोशोऽव॑ पद्यते नो अ॑स्य व्यथते प॒विः
Rk 4
यो अ॑स्मै ह॒विषावि॑ध॒न्न तं पू॒षापि॑ मृष्यते प्र॒थ॒मो वि॑न्दते॒ वसु॑
Rk 5
पू॒षा गा अन्वे॑तु नः पू॒षा र॑क्ष॒त्वर्व॑तः पू॒षा वाजं॑ सनोतु नः
Rk 6
पूष॒न्ननु॒ प्र गा इ॑हि॒ यज॑मानस्य सुन्व॒तः अ॒स्माकं॑ स्तुव॒तामु॒त
Rk 7
माकि॑र्नेश॒न्माकीं॑ रिष॒न्माकीं॒ सं शा॑रि॒ केव॑टे अथारि॑ष्टाभि॒रा ग॑हि
Rk 8
शृ॒ण्वन्तं॑ पू॒षणं॑ व॒यमिर्य॒मन॑ष्टवेदसम् ईशा॑नं रा॒य ई॑महे
Rk 9
पूष॒न्तव॑ व्र॒ते व॒यं न रि॑ष्येम॒ कदा॑ च॒न स्तो॒तार॑स्त इ॒ह स्म॑सि
Rk 10
परि॑ पू॒षा प॒रस्ता॒द्धस्तं॑ दधातु॒ दक्षि॑णम् पुन॑र्नो न॒ष्टमाज॑तु