Sukta 53

Rk 1

व॒यमु॑ त्वा पथस्पते॒ रथं॒ न वाज॑सातये धि॒ये पू॑षन्नयुज्महि

Rk 2

अ॒भि नो॒ नर्यं॒ वसु॑ वी॒रं प्रय॑तदक्षिणम् वा॒मं गृ॒हप॑तिं नय

Rk 3

अदि॑त्सन्तं चिदाघृणे॒ पूष॒न्दाना॑य चोदय प॒णेश्चि॒द्वि म्र॑दा॒ मनः॑

Rk 4

वि प॒थो वाज॑सातये चिनु॒हि वि मृधो॑ जहि साध॑न्तामुग्र नो॒ धियः॑

Rk 5

परि॑ तृन्धि पणी॒नामार॑या॒ हृद॑या कवे अथे॑म॒स्मभ्यं॑ रन्धय

Rk 6

वि पू॑ष॒न्नार॑या तुद प॒णेरि॑च्छ हृ॒दि प्रि॒यम् अथे॑म॒स्मभ्यं॑ रन्धय

Rk 7

आ रि॑ख किकि॒रा कृ॑णु पणी॒नां हृद॑या कवे अथे॑म॒स्मभ्यं॑ रन्धय

Rk 8

यां पू॑षन्ब्रह्म॒चोद॑नी॒मारां॒ बिभ॑र्ष्याघृणे तया॑ समस्य॒ हृद॑य॒मा रि॑ख किकि॒रा कृ॑णु

Rk 9

या ते॒ अष्ट्रा॒ गोओ॑प॒शाघृ॑णे पशु॒साध॑नी तस्या॑स्ते सु॒म्नमी॑महे

Rk 10

उ॒त नो॑ गो॒षणिं॒ धिय॑मश्व॒सां वा॑ज॒सामु॒त नृ॒वत्कृ॑णुहि वी॒तये॑