Sukta 9

Rk 1

इन्द्रेहि॒ मत्स्यन्ध॑सो॒ विश्वे॑भिः सोम॒पर्व॑भिः म॒हाँ अ॑भि॒ष्टिरोज॑सा

Rk 2

एमे॑नं सृजता सु॒ते म॒न्दिमिन्द्रा॑य म॒न्दिने॑ चक्रिं॒ विश्वा॑नि॒ चक्र॑ये

Rk 3

मत्स्वा॑ सुशिप्र म॒न्दिभिः॒ स्तोमे॑भिर्विश्वचर्षणे सचै॒षु सव॑ने॒ष्वा

Rk 4

असृ॑ग्रमिन्द्र ते॒ गिरः॒ प्रति॒ त्वामुद॑हासत अजो॑षा वृष॒भं पति॑म्

Rk 5

सं चो॑दय चि॒त्रम॒र्वाग्राध॑ इन्द्र॒ वरे॑ण्यम् अस॒दित्ते॑ वि॒भु प्र॒भु

Rk 6

अ॒स्मान्त्सु तत्र॑ चोद॒येन्द्र॑ रा॒ये रभ॑स्वतः तुवि॑द्युम्न॒ यश॑स्वतः

Rk 7

सं गोम॑दिन्द्र॒ वाज॑वद॒स्मे पृ॒थु श्रवो॑ बृ॒हत् वि॒श्वायु॑र्धे॒ह्यक्षि॑तम्

Rk 8

अ॒स्मे धे॑हि॒ श्रवो॑ बृ॒हद्द्यु॒म्नं स॑हस्र॒सात॑मम् इन्द्र॒ ता र॒थिनी॒रिषः॑

Rk 9

वसो॒रिन्द्रं॒ वसु॑पतिं गी॒र्भिर्गृ॒णन्त॑ ऋ॒ग्मिय॑म् होम॒ गन्ता॑रमू॒तये॑

Rk 10

सु॒तेसु॑ते॒ न्यो॑कसे बृ॒हद्बृ॑ह॒त एद॒रिः इन्द्रा॑य शू॒षम॑र्चति