Sukta 8

Rk 1

एन्द्र॑ सान॒सिं र॒यिं स॒जित्वा॑नं सदा॒सह॑म् वर्षि॑ष्ठमू॒तये॑ भर

Rk 2

नि येन॑ मुष्टिह॒त्यया॒ नि वृ॒त्रा रु॒णधा॑महै त्वोता॑सो॒ न्यर्व॑ता

Rk 3

इन्द्र॒ त्वोता॑स॒ आ व॒यं वज्रं॑ घ॒ना द॑दीमहि जये॑म॒ सं यु॒धि स्पृधः॑

Rk 4

व॒यं शूरे॑भि॒रस्तृ॑भि॒रिन्द्र॒ त्वया॑ यु॒जा व॒यम् सा॒स॒ह्याम॑ पृतन्य॒तः

Rk 5

म॒हाँ इन्द्रः॑ प॒रश्च॒ नु म॑हि॒त्वम॑स्तु व॒ज्रिणे॑ द्यौर्न प्र॑थि॒ना शवः॑

Rk 6

स॒मो॒हे वा॒ य आश॑त॒ नर॑स्तो॒कस्य॒ सनि॑तौ विप्रा॑सो वा धिया॒यवः॑

Rk 7

यः कु॒क्षिः सो॑म॒पात॑मः समु॒द्र इ॑व॒ पिन्व॑ते उ॒र्वीरापो॒ न का॒कुदः॑

Rk 8

ए॒वा ह्य॑स्य सू॒नृता॑ विर॒प्शी गोम॑ती म॒ही प॒क्वा शाखा॒ न दा॒शुषे॑

Rk 9

ए॒वा हि ते॒ विभू॑तय ऊ॒तय॑ इन्द्र॒ माव॑ते स॒द्यश्चि॒त्सन्ति॑ दा॒शुषे॑

Rk 10

ए॒वा ह्य॑स्य॒ काम्या॒ स्तोम॑ उ॒क्थं च॒ शंस्या॑ इन्द्रा॑य॒ सोम॑पीतये