Sukta 18
Mandala 9 · 7 rks
7 rks · free forever
Listen to this section
Uses your saved HI voice · Narration settings
Rk 1
परि॑ सुवा॒नो गि॑रि॒ष्ठाः प॒वित्रे॒ सोमो॑ अक्षाः मदे॑षु सर्व॒धा अ॑सि
Rk 2
त्वं विप्र॒स्त्वं क॒विर्मधु॒ प्र जा॒तमन्ध॑सः मदे॑षु सर्व॒धा अ॑सि
Rk 3
तव॒ विश्वे॑ स॒जोष॑सो दे॒वासः॑ पी॒तिमा॑शत मदे॑षु सर्व॒धा अ॑सि
Rk 4
आ यो विश्वा॑नि॒ वार्या॒ वसू॑नि॒ हस्त॑योर्द॒धे मदे॑षु सर्व॒धा अ॑सि
Rk 5
य इ॒मे रोद॑सी म॒ही सं मा॒तरे॑व॒ दोह॑ते मदे॑षु सर्व॒धा अ॑सि
Rk 6
परि॒ यो रोद॑सी उ॒भे स॒द्यो वाजे॑भि॒रर्ष॑ति मदे॑षु सर्व॒धा अ॑सि
Rk 7
स शु॒ष्मी क॒लशे॒ष्वा पु॑ना॒नो अ॑चिक्रदत् मदे॑षु सर्व॒धा अ॑सि