Sukta 110

Rk 1

पर्यू॒ षु प्र ध॑न्व॒ वाज॑सातये॒ परि॑ वृ॒त्राणि॑ स॒क्षणिः॑ द्वि॒षस्त॒रध्या॑ ऋण॒या न॑ ईयसे

Rk 2

अनु॒ हि त्वा॑ सु॒तं सो॑म॒ मदा॑मसि म॒हे स॑मर्य॒राज्ये॑ वाजाँ॑ अ॒भि प॑वमान॒ प्र गा॑हसे

Rk 3

अजी॑जनो॒ हि प॑वमान॒ सूर्यं॑ वि॒धारे॒ शक्म॑ना॒ पयः॑ गोजी॑रया॒ रंह॑माणः॒ पुरं॑ध्या

Rk 4

अजी॑जनो अमृत॒ मर्त्ये॒ष्वाँ ऋ॒तस्य॒ धर्म॑न्न॒मृत॑स्य॒ चारु॑णः सदा॑सरो॒ वाज॒मच्छा॒ सनि॑ष्यदत्

Rk 5

अ॒भ्य॑भि॒ हि श्रव॑सा त॒तर्दि॒थोत्सं॒ न कं चि॑ज्जन॒पान॒मक्षि॑तम् शर्या॑भि॒र्न भर॑माणो॒ गभ॑स्त्योः

Rk 6

आदीं॒ के चि॒त्पश्य॑मानास॒ आप्यं॑ वसु॒रुचो॑ दि॒व्या अ॒भ्य॑नूषत वारं॒ न दे॒वः स॑वि॒ता व्यू॑र्णुते

Rk 7

त्वे सो॑म प्रथ॒मा वृ॒क्तब॑र्हिषो म॒हे वाजा॑य॒ श्रव॑से॒ धियं॑ दधुः स त्वं नो॑ वीर वी॒र्या॑य चोदय

Rk 8

दि॒वः पी॒यूषं॑ पू॒र्व्यं यदु॒क्थ्यं॑ म॒हो गा॒हाद्दि॒व आ निर॑धुक्षत इन्द्र॑म॒भि जाय॑मानं॒ सम॑स्वरन्

Rk 9

अध॒ यदि॒मे प॑वमान॒ रोद॑सी इ॒मा च॒ विश्वा॒ भुव॑ना॒भि म॒ज्मना॑ यू॒थे न नि॒ष्ठा वृ॑ष॒भो वि ति॑ष्ठसे

Rk 10

सोमः॑ पुना॒नो अ॒व्यये॒ वारे॒ शिशु॒र्न क्रीळ॒न्पव॑मानो अक्षाः स॒हस्र॑धारः श॒तवा॑ज॒ इन्दुः॑

Rk 11

ए॒ष पु॑ना॒नो मधु॑माँ ऋ॒तावेन्द्रा॒येन्दुः॑ पवते स्वा॒दुरू॒र्मिः वा॒ज॒सनि॑र्वरिवो॒विद्व॑यो॒धाः

Rk 12

स प॑वस्व॒ सह॑मानः पृत॒न्यून्त्सेध॒न्रक्षां॒स्यप॑ दु॒र्गहा॑णि स्वा॒यु॒धः सा॑स॒ह्वान्त्सो॑म॒ शत्रू॑न्