Sukta 85
Mandala 8 · 9 rks
9 rks · free forever
Listen to this section
Uses your saved HI voice · Narration settings
Rk 1
आ मे॒ हवं॑ नास॒त्याश्वि॑ना॒ गच्छ॑तं यु॒वम् मध्वः॒ सोम॑स्य पी॒तये॑
Rk 2
इ॒मं मे॒ स्तोम॑मश्विने॒मं मे॑ शृणुतं॒ हव॑म् मध्वः॒ सोम॑स्य पी॒तये॑
Rk 3
अ॒यं वां॒ कृष्णो॑ अश्विना॒ हव॑ते वाजिनीवसू मध्वः॒ सोम॑स्य पी॒तये॑
Rk 4
शृ॒णु॒तं ज॑रि॒तुर्हवं॒ कृष्ण॑स्य स्तुव॒तो न॑रा मध्वः॒ सोम॑स्य पी॒तये॑
Rk 5
छ॒र्दिर्य॑न्त॒मदा॑भ्यं॒ विप्रा॑य स्तुव॒ते न॑रा मध्वः॒ सोम॑स्य पी॒तये॑
Rk 6
गच्छ॑तं दा॒शुषो॑ गृ॒हमि॒त्था स्तु॑व॒तो अ॑श्विना मध्वः॒ सोम॑स्य पी॒तये॑
Rk 7
यु॒ञ्जाथां॒ रास॑भं॒ रथे॑ वी॒ड्व॑ङ्गे वृषण्वसू मध्वः॒ सोम॑स्य पी॒तये॑
Rk 8
त्रि॒व॒न्धु॒रेण॑ त्रि॒वृता॒ रथे॒ना या॑तमश्विना मध्वः॒ सोम॑स्य पी॒तये॑
Rk 9
नू मे॒ गिरो॑ नास॒त्याश्वि॑ना॒ प्राव॑तं यु॒वम् मध्वः॒ सोम॑स्य पी॒तये॑