Sukta 38

Rk 1

य॒ज्ञस्य॒ हि स्थ ऋ॒त्विजा॒ सस्नी॒ वाजे॑षु॒ कर्म॑सु इन्द्रा॑ग्नी॒ तस्य॑ बोधतम्

Rk 2

तो॒शासा॑ रथ॒यावा॑ना वृत्र॒हणाप॑राजिता इन्द्रा॑ग्नी॒ तस्य॑ बोधतम्

Rk 3

इ॒दं वां॑ मदि॒रं मध्वधु॑क्ष॒न्नद्रि॑भि॒र्नरः॑ इन्द्रा॑ग्नी॒ तस्य॑ बोधतम्

Rk 4

जु॒षेथां॑ य॒ज्ञमि॒ष्टये॑ सु॒तं सोमं॑ सधस्तुती इन्द्रा॑ग्नी॒ आ ग॑तं नरा

Rk 5

इ॒मा जु॑षेथां॒ सव॑ना॒ येभि॑र्ह॒व्यान्यू॒हथुः॑ इन्द्रा॑ग्नी॒ आ ग॑तं नरा

Rk 6

इ॒मां गा॑य॒त्रव॑र्तनिं जु॒षेथां॑ सुष्टु॒तिं मम॑ इन्द्रा॑ग्नी॒ आ ग॑तं नरा

Rk 7

प्रा॒त॒र्याव॑भि॒रा ग॑तं दे॒वेभि॑र्जेन्यावसू इन्द्रा॑ग्नी॒ सोम॑पीतये

Rk 8

श्या॒वाश्व॑स्य सुन्व॒तोऽत्री॑णां शृणुतं॒ हव॑म् इन्द्रा॑ग्नी॒ सोम॑पीतये

Rk 9

ए॒वा वा॑मह्व ऊ॒तये॒ यथाहु॑वन्त॒ मेधि॑राः इन्द्रा॑ग्नी॒ सोम॑पीतये

Rk 10

आहं सर॑स्वतीवतोरिन्द्रा॒ग्न्योरवो॑ वृणे याभ्यां॑ गाय॒त्रमृ॒च्यते॑