Sukta 17

Rk 1

आ या॑हि सुषु॒मा हि त॒ इन्द्र॒ सोमं॒ पिबा॑ इ॒मम् एदं ब॒र्हिः स॑दो॒ मम॑

Rk 2

आ त्वा॑ ब्रह्म॒युजा॒ हरी॒ वह॑तामिन्द्र के॒शिना॑ उप॒ ब्रह्मा॑णि नः शृणु

Rk 3

ब्र॒ह्माण॑स्त्वा व॒यं यु॒जा सो॑म॒पामि॑न्द्र सो॒मिनः॑ सु॒ताव॑न्तो हवामहे

Rk 4

आ नो॑ याहि सु॒ताव॑तो॒ऽस्माकं॑ सुष्टु॒तीरुप॑ पिबा॒ सु शि॑प्रि॒न्नन्ध॑सः

Rk 5

आ ते॑ सिञ्चामि कु॒क्ष्योरनु॒ गात्रा॒ वि धा॑वतु गृ॒भा॒य जि॒ह्वया॒ मधु॑

Rk 6

स्वा॒दुष्टे॑ अस्तु सं॒सुदे॒ मधु॑मान्त॒न्वे॒३॒॑ तव॑ सोमः॒ शम॑स्तु ते हृ॒दे

Rk 7

अ॒यमु॑ त्वा विचर्षणे॒ जनी॑रिवा॒भि संवृ॑तः प्र सोम॑ इन्द्र सर्पतु

Rk 8

तु॒वि॒ग्रीवो॑ व॒पोद॑रः सुबा॒हुरन्ध॑सो॒ मदे॑ इन्द्रो॑ वृ॒त्राणि॑ जिघ्नते

Rk 9

इन्द्र॒ प्रेहि॑ पु॒रस्त्वं विश्व॒स्येशा॑न॒ ओज॑सा वृ॒त्राणि॑ वृत्रहञ्जहि

Rk 10

दी॒र्घस्ते॑ अस्त्वङ्कु॒शो येना॒ वसु॑ प्र॒यच्छ॑सि यज॑मानाय सुन्व॒ते

Rk 11

अ॒यं त॑ इन्द्र॒ सोमो॒ निपू॑तो॒ अधि॑ ब॒र्हिषि॑ एही॑म॒स्य द्रवा॒ पिब॑

Rk 12

शाचि॑गो॒ शाचि॑पूजना॒यं रणा॑य ते सु॒तः आख॑ण्डल॒ प्र हू॑यसे

Rk 13

यस्ते॑ शृङ्गवृषो नपा॒त्प्रण॑पात्कुण्ड॒पाय्यः॑ न्य॑स्मिन्दध्र॒ आ मनः॑

Rk 14

वास्तो॑ष्पते ध्रु॒वा स्थूणांस॑त्रं सो॒म्याना॑म् द्र॒प्सो भे॒त्ता पु॒रां शश्व॑तीना॒मिन्द्रो॒ मुनी॑नां॒ सखा॑

Rk 15

पृदा॑कुसानुर्यज॒तो ग॒वेष॑ण॒ एकः॒ सन्न॒भि भूय॑सः भूर्णि॒मश्वं॑ नयत्तु॒जा पु॒रो गृ॒भेन्द्रं॒ सोम॑स्य पी॒तये॑