Sukta 94
Mandala 7 · 12 rks
12 rks · free forever
Listen at your pace. New audio may take a moment to prepare. Narration settings
Rk 1
इ॒यं वा॑म॒स्य मन्म॑न॒ इन्द्रा॑ग्नी पू॒र्व्यस्तु॑तिः अ॒भ्राद्वृ॒ष्टिरि॑वाजनि
Rk 2
शृ॒णु॒तं ज॑रि॒तुर्हव॒मिन्द्रा॑ग्नी॒ वन॑तं॒ गिरः॑ ई॒शा॒ना पि॑प्यतं॒ धियः॑
Rk 3
मा पा॑प॒त्वाय॑ नो न॒रेन्द्रा॑ग्नी॒ माभिश॑स्तये मा नो॑ रीरधतं नि॒दे
Rk 4
इन्द्रे॑ अ॒ग्ना नमो॑ बृ॒हत्सु॑वृ॒क्तिमेर॑यामहे धि॒या धेना॑ अव॒स्यवः॑
Rk 5
ता हि शश्व॑न्त॒ ईळ॑त इ॒त्था विप्रा॑स ऊ॒तये॑ स॒बाधो॒ वाज॑सातये
Rk 6
ता वां॑ गी॒र्भिर्वि॑प॒न्यवः॒ प्रय॑स्वन्तो हवामहे मे॒धसा॑ता सनि॒ष्यवः॑
Rk 7
इन्द्रा॑ग्नी॒ अव॒सा ग॑तम॒स्मभ्यं॑ चर्षणीसहा मा नो॑ दुः॒शंस॑ ईशत
Rk 8
मा कस्य॑ नो॒ अर॑रुषो धू॒र्तिः प्रण॒ङ्मर्त्य॑स्य इन्द्रा॑ग्नी॒ शर्म॑ यच्छतम्
Rk 9
गोम॒द्धिर॑ण्यव॒द्वसु॒ यद्वा॒मश्वा॑व॒दीम॑हे इन्द्रा॑ग्नी॒ तद्व॑नेमहि
Rk 10
यत्सोम॒ आ सु॒ते नर॑ इन्द्रा॒ग्नी अजो॑हवुः सप्ती॑वन्ता सप॒र्यवः॑
Rk 11
उ॒क्थेभि॑र्वृत्र॒हन्त॑मा॒ या म॑न्दा॒ना चि॒दा गि॒रा आ॒ङ्गू॒षैरा॒विवा॑सतः
Rk 12
ताविद्दुः॒शंसं॒ मर्त्यं॒ दुर्वि॑द्वांसं रक्ष॒स्विन॑म् आ॒भो॒गं हन्म॑ना हतमुद॒धिं हन्म॑ना हतम्