Sukta 66

Rk 1

प्र मि॒त्रयो॒र्वरु॑णयोः॒ स्तोमो॑ न एतु शू॒ष्यः॑ नम॑स्वान्तुविजा॒तयोः॑

Rk 2

या धा॒रय॑न्त दे॒वाः सु॒दक्षा॒ दक्ष॑पितरा अ॒सु॒र्या॑य॒ प्रम॑हसा

Rk 3

ता नः॑ स्ति॒पा त॑नू॒पा वरु॑ण जरितॄ॒णाम् मित्र॑ सा॒धय॑तं॒ धियः॑

Rk 4

यद॒द्य सूर॒ उदि॒तेऽना॑गा मि॒त्रो अ॑र्य॒मा सु॒वाति॑ सवि॒ता भगः॑

Rk 5

सु॒प्रा॒वीर॑स्तु॒ स क्षयः॒ प्र नु याम॑न्त्सुदानवः ये नो॒ अंहो॑ऽति॒पिप्र॑ति

Rk 6

उ॒त स्व॒राजो॒ अदि॑ति॒रद॑ब्धस्य व्र॒तस्य॒ ये म॒हो राजा॑न ईशते

Rk 7

प्रति॑ वां॒ सूर॒ उदि॑ते मि॒त्रं गृ॑णीषे॒ वरु॑णम् अ॒र्य॒मणं॑ रि॒शाद॑सम्

Rk 8

रा॒या हि॑रण्य॒या म॒तिरि॒यम॑वृ॒काय॒ शव॑से इ॒यं विप्रा॑ मे॒धसा॑तये

Rk 9

ते स्या॑म देव वरुण॒ ते मि॑त्र सू॒रिभिः॑ स॒ह इषं॒ स्व॑श्च धीमहि

Rk 10

ब॒हवः॒ सूर॑चक्षसोऽग्निजि॒ह्वा ऋ॑ता॒वृधः॑ त्रीणि॒ ये ये॒मुर्वि॒दथा॑नि धी॒तिभि॒र्विश्वा॑नि॒ परि॑भूतिभिः

Rk 11

वि ये द॒धुः श॒रदं॒ मास॒मादह॑र्य॒ज्ञम॒क्तुं चादृच॑म् अ॒ना॒प्यं वरु॑णो मि॒त्रो अ॑र्य॒मा क्ष॒त्रं राजा॑न आशत

Rk 12

तद्वो॑ अ॒द्य म॑नामहे सू॒क्तैः सूर॒ उदि॑ते यदोह॑ते॒ वरु॑णो मि॒त्रो अ॑र्य॒मा यू॒यमृ॒तस्य॑ रथ्यः

Rk 13

ऋ॒तावा॑न ऋ॒तजा॑ता ऋता॒वृधो॑ घो॒रासो॑ अनृत॒द्विषः॑ तेषां॑ वः सु॒म्ने सु॑च्छ॒र्दिष्ट॑मे नरः॒ स्याम॒ ये च॑ सू॒रयः॑

Rk 14

उदु॒ त्यद्द॑र्श॒तं वपु॑र्दि॒व ए॑ति प्रतिह्व॒रे यदी॑मा॒शुर्वह॑ति दे॒व एत॑शो॒ विश्व॑स्मै॒ चक्ष॑से॒ अर॑म्

Rk 15

शी॒र्ष्णःशी॑र्ष्णो॒ जग॑तस्त॒स्थुष॒स्पतिं॑ स॒मया॒ विश्व॒मा रजः॑ स॒प्त स्वसा॑रः सुवि॒ताय॒ सूर्यं॒ वह॑न्ति ह॒रितो॒ रथे॑

Rk 16

तच्चक्षु॑र्दे॒वहि॑तं शु॒क्रमु॒च्चर॑त् पश्ये॑म श॒रदः॑ श॒तं जीवे॑म श॒रदः॑ श॒तम्

Rk 17

काव्ये॑भिरदा॒भ्या या॑तं वरुण द्यु॒मत् मि॒त्रश्च॒ सोम॑पीतये

Rk 18

दि॒वो धाम॑भिर्वरुण मि॒त्रश्चा या॑तम॒द्रुहा॑ पिब॑तं॒ सोम॑मातु॒जी

Rk 19

आ या॑तं मित्रावरुणा जुषा॒णावाहु॑तिं नरा पा॒तं सोम॑मृतावृधा