Sukta 15
Mandala 7 · 15 rks
15 rks · free forever
Listen at your pace. New audio may take a moment to prepare. Narration settings
Rk 1
उ॒प॒सद्या॑य मी॒ळ्हुष॑ आ॒स्ये॑ जुहुता ह॒विः यो नो॒ नेदि॑ष्ठ॒माप्य॑म्
Rk 2
यः पञ्च॑ चर्ष॒णीर॒भि नि॑ष॒साद॒ दमे॑दमे क॒विर्गृ॒हप॑ति॒र्युवा॑
Rk 3
स नो॒ वेदो॑ अ॒मात्य॑म॒ग्नी र॑क्षतु वि॒श्वतः॑ उ॒तास्मान्पा॒त्वंह॑सः
Rk 4
नवं॒ नु स्तोम॑म॒ग्नये॑ दि॒वः श्ये॒नाय॑ जीजनम् वस्वः॑ कु॒विद्व॒नाति॑ नः
Rk 5
स्पा॒र्हा यस्य॒ श्रियो॑ दृ॒शे र॒यिर्वी॒रव॑तो यथा अग्रे॑ य॒ज्ञस्य॒ शोच॑तः
Rk 6
सेमां वे॑तु॒ वष॑ट्कृतिम॒ग्निर्जु॑षत नो॒ गिरः॑ यजि॑ष्ठो हव्य॒वाह॑नः
Rk 7
नि त्वा॑ नक्ष्य विश्पते द्यु॒मन्तं॑ देव धीमहि सु॒वीर॑मग्न आहुत
Rk 8
क्षप॑ उ॒स्रश्च॑ दीदिहि स्व॒ग्नय॒स्त्वया॑ व॒यम् सु॒वीर॒स्त्वम॑स्म॒युः
Rk 9
उप॑ त्वा सा॒तये॒ नरो॒ विप्रा॑सो यन्ति धी॒तिभिः॑ उपाक्ष॑रा सह॒स्रिणी॑
Rk 10
अ॒ग्नी रक्षां॑सि सेधति शु॒क्रशो॑चि॒रम॑र्त्यः शुचिः॑ पाव॒क ईड्यः॑
Rk 11
स नो॒ राधां॒स्या भ॒रेशा॑नः सहसो यहो भग॑श्च दातु॒ वार्य॑म्
Rk 12
त्वम॑ग्ने वी॒रव॒द्यशो॑ दे॒वश्च॑ सवि॒ता भगः॑ दिति॑श्च दाति॒ वार्य॑म्
Rk 13
अग्ने॒ रक्षा॑ णो॒ अंह॑सः॒ प्रति॑ ष्म देव॒ रीष॑तः तपि॑ष्ठैर॒जरो॑ दह
Rk 14
अधा॑ म॒ही न॒ आय॒स्यना॑धृष्टो॒ नृपी॑तये पूर्भ॑वा श॒तभु॑जिः
Rk 15
त्वं नः॑ पा॒ह्यंह॑सो॒ दोषा॑वस्तरघाय॒तः दिवा॒ नक्त॑मदाभ्य