Sukta 45

Rk 1

य आन॑यत्परा॒वतः॒ सुनी॑ती तु॒र्वशं॒ यदु॑म् इन्द्रः॒ स नो॒ युवा॒ सखा॑

Rk 2

अ॒वि॒प्रे चि॒द्वयो॒ दध॑दना॒शुना॑ चि॒दर्व॑ता इन्द्रो॒ जेता॑ हि॒तं धन॑म्

Rk 3

म॒हीर॑स्य॒ प्रणी॑तयः पू॒र्वीरु॒त प्रश॑स्तयः नास्य॑ क्षीयन्त ऊ॒तयः॑

Rk 4

सखा॑यो॒ ब्रह्म॑वाह॒सेऽर्च॑त॒ प्र च॑ गायत स हि नः॒ प्रम॑तिर्म॒ही

Rk 5

त्वमेक॑स्य वृत्रहन्नवि॒ता द्वयो॑रसि उ॒तेदृशे॒ यथा॑ व॒यम्

Rk 6

नय॒सीद्वति॒ द्विषः॑ कृ॒णोष्यु॑क्थशं॒सिनः॑ नृभिः॑ सु॒वीर॑ उच्यसे

Rk 7

ब्र॒ह्माणं॒ ब्रह्म॑वाहसं गी॒र्भिः सखा॑यमृ॒ग्मिय॑म् गां न दो॒हसे॑ हुवे

Rk 8

यस्य॒ विश्वा॑नि॒ हस्त॑योरू॒चुर्वसू॑नि॒ नि द्वि॒ता वी॒रस्य॑ पृतना॒षहः॑

Rk 9

वि दृ॒ळ्हानि॑ चिदद्रिवो॒ जना॑नां शचीपते वृ॒ह मा॒या अ॑नानत

Rk 10

तमु॑ त्वा सत्य सोमपा॒ इन्द्र॑ वाजानां पते अहू॑महि श्रव॒स्यवः॑

Rk 11

तमु॑ त्वा॒ यः पु॒रासि॑थ॒ यो वा॑ नू॒नं हि॒ते धने॑ हव्यः॒ स श्रु॑धी॒ हव॑म्

Rk 12

धी॒भिरर्व॑द्भि॒रर्व॑तो॒ वाजाँ॑ इन्द्र श्र॒वाय्या॑न् त्वया॑ जेष्म हि॒तं धन॑म्

Rk 13

अभू॑रु वीर गिर्वणो म॒हाँ इ॑न्द्र॒ धने॑ हि॒ते भरे॑ वितन्त॒साय्यः॑

Rk 14

या त॑ ऊ॒तिर॑मित्रहन्म॒क्षूज॑वस्त॒मास॑ति तया॑ नो हिनुही॒ रथ॑म्

Rk 15

स रथे॑न र॒थीत॑मो॒ऽस्माके॑नाभि॒युग्व॑ना जेषि॑ जिष्णो हि॒तं धन॑म्

Rk 16

य एक॒ इत्तमु॑ ष्टुहि कृष्टी॒नां विच॑र्षणिः पति॑र्ज॒ज्ञे वृष॑क्रतुः

Rk 17

यो गृ॑ण॒तामिदासि॑था॒पिरू॒ती शि॒वः सखा॑ स त्वं न॑ इन्द्र मृळय

Rk 18

धि॒ष्व वज्रं॒ गभ॑स्त्यो रक्षो॒हत्या॑य वज्रिवः सा॒स॒ही॒ष्ठा अ॒भि स्पृधः॑

Rk 19

प्र॒त्नं र॑यी॒णां युजं॒ सखा॑यं कीरि॒चोद॑नम् ब्रह्म॑वाहस्तमं हुवे

Rk 20

स हि विश्वा॑नि॒ पार्थि॑वाँ॒ एको॒ वसू॑नि॒ पत्य॑ते गिर्व॑णस्तमो॒ अध्रि॑गुः

Rk 21

स नो॑ नि॒युद्भि॒रा पृ॑ण॒ कामं॒ वाजे॑भिर॒श्विभिः॑ गोम॑द्भिर्गोपते धृ॒षत्

Rk 22

तद्वो॑ गाय सु॒ते सचा॑ पुरुहू॒ताय॒ सत्व॑ने शं यद्गवे॒ न शा॒किने॑

Rk 23

न घा॒ वसु॒र्नि य॑मते दा॒नं वाज॑स्य॒ गोम॑तः यत्सी॒मुप॒ श्रव॒द्गिरः॑

Rk 24

कु॒वित्स॑स्य॒ प्र हि व्र॒जं गोम॑न्तं दस्यु॒हा गम॑त् शची॑भि॒रप॑ नो वरत्

Rk 25

इ॒मा उ॑ त्वा शतक्रतो॒ऽभि प्र णो॑नुवु॒र्गिरः॑ इन्द्र॑ व॒त्सं न मा॒तरः॑

Rk 26

दू॒णाशं॑ स॒ख्यं तव॒ गौर॑सि वीर गव्य॒ते अश्वो॑ अश्वाय॒ते भ॑व

Rk 27

स म॑न्दस्वा॒ ह्यन्ध॑सो॒ राध॑से त॒न्वा॑ म॒हे न स्तो॒तारं॑ नि॒दे क॑रः

Rk 28

इ॒मा उ॑ त्वा सु॒तेसु॑ते॒ नक्ष॑न्ते गिर्वणो॒ गिरः॑ व॒त्सं गावो॒ न धे॒नवः॑

Rk 29

पु॒रू॒तमं॑ पुरू॒णां स्तो॑तॄ॒णां विवा॑चि वाजे॑भिर्वाजय॒ताम्

Rk 30

अ॒स्माक॑मिन्द्र भूतु ते॒ स्तोमो॒ वाहि॑ष्ठो॒ अन्त॑मः अ॒स्मान्रा॒ये म॒हे हि॑नु

Rk 31

अधि॑ बृ॒बुः प॑णी॒नां वर्षि॑ष्ठे मू॒र्धन्न॑स्थात् उ॒रुः कक्षो॒ न गा॒ङ्ग्यः

Rk 32

यस्य॑ वा॒योरि॑व द्र॒वद्भ॒द्रा रा॒तिः स॑ह॒स्रिणी॑ स॒द्यो दा॒नाय॒ मंह॑ते

Rk 33

तत्सु नो॒ विश्वे॑ अ॒र्य आ सदा॑ गृणन्ति का॒रवः॑ बृ॒बुं स॑हस्र॒दात॑मं सू॒रिं स॑हस्र॒सात॑मम्