Sukta 82
Mandala 5 · 9 rks
9 rks · free forever
Listen at your pace. New audio may take a moment to prepare. Narration settings
Rk 1
तत्स॑वि॒तुर्वृ॑णीमहे व॒यं दे॒वस्य॒ भोज॑नम् श्रेष्ठं॑ सर्व॒धात॑मं॒ तुरं॒ भग॑स्य धीमहि
Rk 2
अस्य॒ हि स्वय॑शस्तरं सवि॒तुः कच्च॒न प्रि॒यम् न मि॒नन्ति॑ स्व॒राज्य॑म्
Rk 3
स हि रत्ना॑नि दा॒शुषे॑ सु॒वाति॑ सवि॒ता भगः॑ तं भा॒गं चि॒त्रमी॑महे
Rk 4
अ॒द्या नो॑ देव सवितः प्र॒जाव॑त्सावीः॒ सौभ॑गम् परा॑ दु॒ष्ष्वप्न्यं॑ सुव
Rk 5
विश्वा॑नि देव सवितर्दुरि॒तानि॒ परा॑ सुव यद्भ॒द्रं तन्न॒ आ सु॑व
Rk 6
अना॑गसो॒ अदि॑तये दे॒वस्य॑ सवि॒तुः स॒वे विश्वा॑ वा॒मानि॑ धीमहि
Rk 7
आ वि॒श्वदे॑वं॒ सत्प॑तिं सू॒क्तैर॒द्या वृ॑णीमहे स॒त्यस॑वं सवि॒तार॑म्
Rk 8
य इ॒मे उ॒भे अह॑नी पु॒र एत्यप्र॑युच्छन् स्वा॒धीर्दे॒वः स॑वि॒ता
Rk 9
य इ॒मा विश्वा॑ जा॒तान्या॑श्रा॒वय॑ति॒ श्लोके॑न प्र च॑ सु॒वाति॑ सवि॒ता