Sukta 64

Rk 1

वरु॑णं वो रि॒शाद॑समृ॒चा मि॒त्रं ह॑वामहे परि॑ व्र॒जेव॑ बा॒ह्वोर्ज॑ग॒न्वांसा॒ स्व॑र्णरम्

Rk 2

ता बा॒हवा॑ सुचे॒तुना॒ प्र य॑न्तमस्मा॒ अर्च॑ते शेवं॒ हि जा॒र्यं॑ वां॒ विश्वा॑सु॒ क्षासु॒ जोगु॑वे

Rk 3

यन्नू॒नम॒श्यां गतिं॑ मि॒त्रस्य॑ यायां प॒था अस्य॑ प्रि॒यस्य॒ शर्म॒ण्यहिं॑सानस्य सश्चिरे

Rk 4

यु॒वाभ्यां॑ मित्रावरुणोप॒मं धे॑यामृ॒चा यद्ध॒ क्षये॑ म॒घोनां॑ स्तोतॄ॒णां च॑ स्पू॒र्धसे॑

Rk 5

आ नो॑ मित्र सुदी॒तिभि॒र्वरु॑णश्च स॒धस्थ॒ आ स्वे क्षये॑ म॒घोनां॒ सखी॑नां च वृ॒धसे॑

Rk 6

यु॒वं नो॒ येषु॑ वरुण क्ष॒त्रं बृ॒हच्च॑ बिभृ॒थः उ॒रु णो॒ वाज॑सातये कृ॒तं रा॒ये स्व॒स्तये॑

Rk 7

उ॒च्छन्त्यां॑ मे यज॒ता दे॒वक्ष॑त्रे॒ रुश॑द्गवि सु॒तं सोमं॒ न ह॒स्तिभि॒रा प॒ड्भिर्धा॑वतं नरा॒ बिभ्र॑तावर्च॒नान॑सम्